विशिष्ट जातीधर्माच्या लोकांना टार्गेट करण्याचे षडयंत्र

कोल्हापूर: सक्तवसुली संचलनालय (ED) आणि प्राप्तीकर विभागाच्या धाडीनंतर राष्ट्रवादी काँग्रेसचे नेते हसन मुश्रीफ यांची पहिली प्रतिक्रिया समोर आली आहे. हसन मुश्रीफ हे सध्या मुंबईतील निवासस्थानी असल्याची माहिती आहे. हसन मुश्रीफ यांनी एक व्हिडिओ प्रसिद्ध केला आहे. यामध्ये त्यांनी म्हटले आहे की, मी काही कामाच्या निमित्ताने बाहेर आहे. मला दुरध्वनीवरुन घरावर छापा पडल्याची माहिती समजली. माझ्या घरासह कारखाना, मुलीच्या घरी आणि इतर नातेवाईकांच्या घरी सध्या तपास मोहीम सुरु आहे. मी राष्ट्रवादी काँग्रेसच्या कार्यकर्त्यांना आवाहन करतो की, त्यांनी शांतता ठेवावी. कागल बंदची घोषणा मागे घ्यावी. आपल्याला सरकारी अधिकाऱ्यांना सहकार्य करायचे आहे. आपल्याला कुठलाही दंगाधोपा करायचा नाही. त्यामुळे राष्ट्रवादीच्या कार्यकर्त्यांनी कायदा हातात घेऊ नये, अशी विनंती करत असल्याचे हसन मुश्रीफ यांनी म्हटले.

यावेळी हसन मुश्रीफ यांनी भाजप आणि चौकशी यंत्रणांवर अप्रत्यक्षपणे काही गंभीर आरोप केले. यापूर्वी तपास यंत्रणांनी माझ्या घरावर छापे टाकले होते. तेव्हा त्यांनी सगळी माहिती घेतली होती. मग आता पुन्हा कशासाठी छापा टाकण्यात आला, याची मला माहिती नसल्याचे हसन मुश्रीफ यांनी म्हटले. मी यासंदर्भात प्रसारमाध्यमांशी बोलेन. तोपर्यंत कार्यकर्त्यांनी शांत राहावे. कागलमधील भाजपचा नेता गेल्या काही दिवसांपासून माझ्यावर कारवाई करण्यासाठी दिल्लीत चकरा मारत होता. त्यांच्या कार्यकर्त्यांनी आमच्या कार्यकर्त्यांना सांगितलं होतं की, मुश्रीफ यांच्यावर चार दिवसांत कारवाई होणार आहे. हे गलिच्छ राजकारण असून मी त्याचा निषेध करतो. काही दिवसांपूर्वी नवाब मलिक यांना तुरुंगात टाकण्यात आले. आता किरीट सोमय्या यांनी सांगितल्यानुसार माझ्यावर कारवाई झाली, सोमय्यांचं पुढचं टार्गेट अस्लम शेख आहेत. त्यामुळे विशिष्ट जातीधर्माच्या लोकांना लक्ष्य केले जात आहे का, अशी शंका येत असल्याचे हसन मुश्रीफ यांनी म्हटले.

कागलमध्ये राष्ट्रवादी काँग्रेसचे कार्यकर्ते आक्रमक

राष्ट्रवादी काँग्रेसचे नेते हसन मुश्रीफ यांच्या कागलमधील निवासस्थानी बुधवारी सकाळी सक्तवसुली संचलनालय (ईडी) आणि प्राप्तीकर खात्याकडून धाड टाकण्यात आली. या धाडीनंतर कोल्हापूरमधील वातावरण तापायला सुरुवात झाली आहे. हसन मुश्रीफ यांच्या घरावर ईडीने धाड टाकल्याचे समजताच त्यांच्या कागल येथील निवासस्थानाबाहेर गर्दी जमायला सुरुवात झाली. सध्या हसन मुश्रीफांच्या घराच्या परिसरात राष्ट्रवादीच्या कार्यकर्त्यांनी प्रचंड गर्दी केली आहे. या पार्श्वभूमीवर कागल परिसरात पोलिसांचा मोठा फौजफाटा तैनात करण्यात आला आहे. पोलिसांनी मुश्रीफ यांच्या घराकडे जाणारे सर्व रस्ते बंद केले आहेत. त्यामुळे हसन मुश्रीफ यांचे कार्यकर्ते आक्रमक झाले आहेत. काहीवेळापूर्वीच याठिकाणी पोलीस आणि राष्ट्रवादीच्या कार्यकर्त्यांमध्ये बाचाबाची झाल्याचा प्रकार घडला. या परिसरातील अनेक रस्ते राष्ट्रवादीच्या कार्यकर्त्यांनी फुलून गेले आहेत. मुश्रीफ यांच्या कार्यकर्त्यांनी कागल बंदची हाक दिली होती.