बस आणि कंटेनरची समोरासमोर जोरदार धडक, बसचा अक्षरश: चक्काचूर; भीषण अपघातात ९ प्रवासी जखमी

नांदेड : मुखेड - लातूर राज्य रस्त्यावरील मुखेड नजीक असलेल्या दबडे शिरूर पाटीजवळ महामंडळाच्या बसची आणि कंटेनरची समोरासमोर धडक झाल्याने भीषण अपघात झाला. या अपघातात एसटी चालक, वाहक यांच्यासह बस मधील दोन प्रवासी व इतर दोन असे एकूण सहा प्रवासी जखमी झाले. दरम्यान, कंटेनर चालक मद्यधुंद अवस्थेत असल्याचं जखमी प्रवाशांनी सांगितलं. ही घटना शुक्रवारी सायंकाळी घडली. अपघाता झाला तेव्हा कंटेनर चालक घटनास्थळावरून फरार झाला.

मुखेड आगाराची बस क्रमांक एमएच २० बीएल २२२८ ही कामजळगा या गावावरून प्रवाशांना घेऊन मुखेडकडे येत होती. तर कंटेनर क्रमांक जीजे ०५ बीएक्स ७६४२ हा मुखेडकडून लातूरला जात होता, कंटेनर चालकाने दुसऱ्या वाहनास ओव्हरटेक करण्याच्या नादात मुखेडकडे येणाऱ्या बसला दबडे शिरूर पाटील येथे समोरासमोर धडक दिली. ही धडक एवढी भीषण होती की एसटीचा समोरचा भाग अक्षरश: चक्काचूर झाला. या घटनेत एसटी चालक रामदास कबीर (वय ४०) आणि वाहक एम.एन पांढरे, एसटी मधील प्रवासी रघुनाथ मस्कले (वय ५०), पुष्पाबाई बनसोडे (वय ५२) हे जखमी झाले.

दरम्यान, कंटेनर चालकाने या अपघाताआधी रस्त्याच्या कडेला थांबलेल्या बालाजी गणपतराव हाके (वय ६५) या पादचार्‍याला धडक दिली. यात हाके हे गंभीर जखमी झाले. कंटेनरमध्ये बसलेले प्रवासी देवीदास राठोड (वय ५५ रा. सन्मुखवाडी) हे देखील गंभीर जखमी झाले. ही घटना समजतात घटनास्थळी मुखेड पोलीस ठाण्याचे पोलीस निरीक्षक विलास गोबाडे, पोलीस पाटील माधव टाकळे, सामाजिक कार्यकर्ते विठ्ठल माणिकराव घोगरे, महामंडळाचे कर्मचारी बालाजी नगरे, एस.टी सेनेचे बालाजी रिंदकवाले, नागोराव शेटवाड, उत्तम पवित्रे यांनी घटनास्थळी धाव घेऊन जखमींना एसटी मधून बाहेर काढले.

जखमींना उपचारासाठी मुखेड येथील उपजिल्हा रुग्णालयात दाखल करण्यात आले. बसचालक रामदास कबीर यांचे दोन्ही पाय अडकल्याने त्यांना बाहेर काढण्यासाठी तब्बल अर्धा तास लागला. गंभीर जखमी असलेले बसचालक रामदास कबीर यांचे दोन्ही पाय मोडल्याने मुखेड येथील उपजिल्हा रुग्णालयात प्राथमिक उपचार करून पुढील उपचारासाठी नांदेड येथे हलवण्यात आले आहे. इतर रुग्णांवर मुखेड येथे उपचार सुरू आहेत.

या अपघातात जखमी झालेल्या रुग्णांवर वैद्यकीय अधिकारी डॉक्टर सुधाकर तहाडे, डॉक्टर नरेंद्र गादेकर यांनी उपचार केले. उपजिल्हा रुग्णालय येथे धाव घेऊन आगारप्रमुख रा.सू बोधे, सुशील पत्की, बजरंग कल्याणी, भगवान रोडगे, बालाजी नगरे, उपसरपंच शिवाजी राठोड, अँड. हाके, बालाजी शिंदे बिल्लाळीकर, विठ्ठलराव घोगरे प्रताप कोल्हे नागेश लोखंडे, उल्हास ईमडे यांनी जखमींना मदत केली. दरम्यान, ही घटना घडताच मद्यप्राशन केलेला कंटेनर चालक फरार झाला आहे.