धाराशिव च्या त्‍या डॉक्टरास अखेर अटक ....

 धाराशिव : उमरगा शहरातील बहुचर्चित बनावट अहवालद्वारे रुग्णांची व शासनाची लुट प्रकरणी १६ महिन्यांपासून फरार असलेल्या डॉ. आर. डी शेंडगे यांना आज सकाळी ७ वाजता धाराशिव पोलीसांनी अटक केली होती. दुपारी उमरगा कोर्टाने त्यांना अंतरिम जामीन मंजूर केला. पोलीस अधीक्षक अतुल कुलकर्णी अपर पोलीस अधीक्षक नवनीत कॉवत यांच्या मार्गदर्शनाखाली ही कारवाई करण्यात आली. या प्रकरणातील तपास पूर्ण झालेला असून सर्व कागदपत्रे आरोपीच्या वकिलाने कोर्टात सादर केली. तसेच संबधित व्यक्तीचा जबाब प्रक्रिया पूर्ण झाल्याचा युक्तिवाद आरोपीच्या वकिलाने कोर्टात केला होता.

उमरगा शहरातील डॉ. आर. डी. शेंडगे हॉस्पिटल अँड रिसर्च सेंटर मधून रुग्णांची आणि शासनाची बनावट बिलाद्वारे लूट झाली होती. डॉ. आर. डी. शेंडगे हे गेल्या १६ महिन्यापासून फरार होते. या प्रकरणी विशेष पोलीस महानिरिक्षक मल्लिकार्जुन प्रसन्ना यांनी शेंडगे यांना तात्काळ अटक करा, आरोपी सापडत नसेल तर सीआरपीसी कलम ८२,८३ अंतर्गत संपती जप्त करण्याचे आदेश दिले आहेत. विशेष पोलीस महानिरिक्षक मल्लिकार्जुन प्रसन्ना हे धाराशिव जिल्हा दौऱ्यावर आले असता पत्रकार परिषदेत हे आदेश दिले होते.
उमरगा शहरातील प्रसिद्ध शेंडगे हॉस्पिटल अँड रिसर्च सेंटर येथे २०२१ मध्ये झालेल्या १०० ते १५० कोटी रुपयाच्या घोटाळयातील मुख्य आरोपी डॉ. शेंडगे हे गेल्या १६ महिन्यापासून पोलिसांना सापडत नव्हते . त्यामुळे पोलीस कारवाई बद्दल उमरगा शहरामध्ये मध्ये उलट सुलट चर्चा ऐकायला मिळत होती.


उमरगा शहरातील प्रसिद्ध शेंडगे हॉस्पिटल अँड रिसर्च सेंटर यांनी रुग्ण, महात्मा फुले जन आरोग्य विमा योजना,खाजगी विमा कंपनी यांची बोगस तपासणी अहवालद्वारे फसवणूक केल्या प्रकरणी नियुक्त केलेल्या त्रिसदस्यीय समितीच्या चौकशीत दोषी आढळले होते. चौकशी समितीच्या अहवालानुसार डॉ. अशोक बढे यांनी १२ ऑक्टोबर २०२१ रोजी उमरगा पोलीस स्टेशनला डॉ. शेंडगे, तत्कालीन प्रयोग शाळा तंत्रज्ञ तानाजी बनसोडे यांच्या विरुध्द भा.द.वि कलम ४२०,४६५,४६८,४७१,३४ अन्वये गुन्हा दाखल झाला होता. यातील दुसरा आरोपी प्रयोग शाळा तंत्रज्ञ तानाजी बनसोडे याला ५ महिन्याॉनंतर जामीन मिळाला आहे.तर, मुख्य आरोपी शेंडगे फरार होते.


या प्रकरणातील दुसरा आरोपी प्रयोगशाळा तंत्रज्ञ तानाजी बनसोडे याला आजारी नसताना ३ दिवस रुग्णालयात दाखल झाल्याचं दाखवण्यात आलं आणि खासगी विमा कंपनीकडून २८ हजार रुपये घेण्यात आले. तसेच तानाजी बनसोडे याला डॉ. शेंडगे ज्युनिअर काँलेजचा कर्मचारी दाखवले होते. हा प्रकार जेव्हा तानाजी बनसोडे याला समजला तेव्हा फसवणुकीची प्रथम तक्रार तानाजी बनसोडे याने दिली होती.