पोटच्या मुलीसोबत बापाने केलेल्या भयंकर कृत्या

बीड : बीडमधून एक धक्कादायक घटना समोर आली आहे. बाप-लेकीच्या पवित्र नात्याला काळीमा फासणारी ही घटना आहे. दारुड्या पित्याने आपल्या १० वर्षीय चिमुकलीवर अतिप्रसंगाचा प्रयत्न केल्याचा संतापजनक प्रकार घडला आहे. आजी-आजोबांच्या प्रसंगावधानामुळे मोठा अनर्थ टळला आहे. या प्रकरणी चिमुकलीच्या आजीने बीड पोलीस स्टेशनमध्ये दाखल केलेल्या तक्रारीनंतर आरोपीविरोधात गुन्हा दाखल करण्यात आला असून, त्याला अटक करण्यात आली आहे.
मिळालेल्या माहितीनुसार, आरोपीने आपल्याच मुलीवर अतिप्रसंगाचा प्रयत्न केला आहे. आरोपी दारुच्या आहारी गेला होता. दारुच्या नशेत तो घरच्यांना त्रास देत होता. त्याच्या सततच्या त्रासाला कंटाळून त्याची पत्नी ६ महिन्यांपूर्वी माहेरी राहण्यासाठी गेली आहे. आरोपीला दोन मुली आहेत. एकीचं वय १० वर्ष असून, दुसरी सहा वर्षांची आहे. त्या दोन्ही मुलींचा सांभाळ त्यांचे आजी, आजोबा करतात.

काही दिवसांपूर्वी आरोपीने "तू तुझ्या आईला फोन का केलास", असे म्हणत १० वर्षीय पीडित मुलीला आरोपीने मारहाण केली. त्यानंतर दुसऱ्या दिवशी पहाटे त्याने तिच्यावर अतिप्रसंग करण्याचा प्रयत्न केला. मात्र, यावेळी आजी, आजोबांनी नातीची आरोपी बापाच्या तावडीतून सुटका केली. त्यानंतर त्यांनी रिक्षाने पीडित मुलीला आपल्या नातेवाईकांच्या घरी घेऊन गेले. दरम्यान, या प्रकरणी आजीच्या तक्रारीवरुन आरोपीविरोधात बीड शहर पोलीस ठाण्यात विनयभंग व बाललैंगिक अत्याचार प्रतिबंधक कलमांन्वये गुन्हा दाखल करण्यात आला आहे. पोलिसांनी आरोपी बापाला बेड्या ठोकल्या आहेत.