गो-शाळेतून जनावरांची विक्री; संस्थाचालकांसह वैद्यकीय अधिकाऱ्यांवर गुन्हे.

भंडारा : जनावरांच्या अवैध वाहतूकप्रकरणी पोलिसांनी जप्त केलेल्या जनावरांची गो-शाळेतूनच परस्पर विक्री करणाऱ्या रॅकेटचा पोलिसांनी पर्दाफाश केला आहे. याप्रकरणी पोलिसांनी गो-शाळेच्या संचालकांसह चार वैद्यकीय अधिकाऱ्यांवर गुन्हा नोंदविला आहे. या कारवाईमुळे गोतस्करांमध्ये खळबळ उडाली आहे.

विसर्जन सज्जन चौसरे रा. गौतमनगर वॉर्ड, पवनी, विपीन शरद तलमले रा. पवनी, मिलिंद रामदास बोरकर रा. पवनी, खुशाल दिलीप मुंडले रा. बेटाळा, विलास बेदनाथ तिघरे रा. सिरसाळा, दत्तू शंकर मुनरतीवार रा. पवनी, लता दौलत मसराम रा. पवनी, वर्षा लालचंद वैद्य रा. सिरसाळा, माया विसर्जन चौसरे रा. पवनी, महेश दौलत मसराम रा. पवनी, युवराज रवींद्र करकाळे रा. पवनी, नानाजी मोतीराम पाटील रा. सिरसाळा, शिवशंकर भाष्कर मेश्राम रा. पवनी, डॉ. तुळशीदास शहारे रा. खात रोड भंडारा, डॉ. हेमंतकुमार गभने रा. अड्याळ, डॉ. दिनेश चव्हाण रा. पवनी, डॉ. सुधाकर महादेव खुणे रा. कन्हाळगाव ता. अर्जुनी मोरगाव जि.गोंदिया अशी आरोपींची नावे आहेत. 
    भंडारा जिल्ह्यात जनावरांची तस्करी मोठ्या प्रमाणात वाढली आहे. अलिकडे पोलिस अधीक्षक लोहित मतानी यांनी जनावरे तस्करांविरुद्ध मोहिम उघडून अनेक कारवाया केल्या. या कारवायांतून जप्त केलेली जनावरे विविध गो-शाळेत पाठविण्यात आली. दरम्यान, पवनी तालुक्यातील सिरसाळा येथील बळीराम गो-शाळेत जिल्ह्यातील दिघोरी, अड्याळ, वरठी, सिहोरा, पवनी येथे केलेल्या कारवाईत जप्त केलेल्या जनावरांसह चंद्रपूर जिल्ह्यातील ब्रह्मपुरी येथील १५२ जनावरे ठेवण्यात आली होती. परंतु, गो-शाळा संचालकांनी आर्थिक फायद्याकरिता १५२ जनावरांपैकी ८९ जनावरे व भंडारा जिल्ह्यातील इतर जनावरे तस्करांना विकून टाकली. तसेच गो-शाळेतील मृत जनावरांबाबत संबंधित पोलिस ठाण्याला माहिती न देता त्यांची परस्पर विल्हेवाट लावून शासनाची फसवणूक केली. यासाठी त्यांचे बनावट मृत्यू प्रमाणपत्र तयार करण्यासाठी पशुवैद्यकीय अधिकाऱ्यांनीही मदत केली. पवनी पोलिसांनी या प्रकरणाचा तपास केला असता गो-शाळेतील तस्करीचा धक्कादायक प्रकार पुढे आला. याप्रकरणी सहाय्यक पोलिस निरीक्षक आशिष चिलांगे यांच्या तक्रारीवरुन पोलिसांनी आरोपींविरुद्ध गुन्हे नोंदविले आहे. तपास पोलिस निरीक्षक गढरी करीत आहेत.

वैद्यकीय अधिकारी द्यायचे बोगस मृत्यू प्रमाणपत्र

या संपूर्ण रॅकेटमध्ये पशुवैद्यकीय अधिकाऱ्यांचाही मोठा सहभाग असल्याचे तपासात दिसून आले आहे. आरोपींमध्ये समावेश असलेले पशुवैद्यकीय अधिकारी मृत जनावरांचे शवविच्छेदन न करता मृत्यूचे बोगस मृत्यू प्रमाणपत्र तयार करुन द्यायचे. त्यासाठी गो्-शाळा संचालकांकडून आर्थिक फायदा करवून घ्यायचे. पोलिस अधीक्षक लोहित मतानी, अपर पोलिस अधीक्षक अनिकेत भारती आणि उपविभागीय पोलिस अधिकारी रिना जनबंधू यांच्या आदेशाने ही कारवाई करण्यात आली आहे.