ज्याच्यासोबत आयुष्याची स्वप्ने पाहिली, त्याचा होणाऱ्या पतीला एक फोन अन् क्षणात होत्याचं नव्हतं झालं!

नांदेड : शाळेत हुशार होती, अभ्यासात गती होती, मोठं होऊन डॉक्टर बनायचं स्वप्न होतं, त्यामुळे लहाणपणापासूनच त्या दिशेने तयारी सुरु केली होती. पण घरची परिस्थिती बेताची असल्याने आईवडिलांनी तिच्या शिक्षणावर फारसं लक्ष दिलं नाही. पण पोरीला शिकवा, तुमचं नाव मोठं करेल, हा गुरुजींचा सल्ला आईवडिलांनी मानला अन् तिला पुढे शिकवण्याचा निर्धार केला. पण गावातलाच एक मुलगा तिला आवडला, दोघांचं एकमेकांवर निस्सीम प्रेम होतं. दोघांनी एकमेकांवर जीव ओळावून टाकलेला. याचीच कुणकुण घरच्यांना लागली. घरच्यांनी तिला समज दिली. पण पोरीचा त्याच्यावर जीव बसलेला. कुटुंबियांनी मग तिच्या मनाविरोधात जाऊन सोयरीक जमवली. पण पुढे लग्न मोडलं. कुटुंबाची बदनामी झाल्याचा राग मनात ठेऊन पोटच्या पोरीला बापाने आणि भावाने संपवलं.

ही घटना आहे नांदेडची... शुभांगी जोगदंड या मुलीची... वैद्यकीय शिक्षण घेणाऱ्या शुभांगीची वडील आणि भावानेच हत्या केल्याची घटना समोर आल्यानंतर महाराष्ट्र सुन्न झाला. लेकीने प्रेमाच्या वाटेवर टाकलेलं पाऊल घरच्यांचा डोळ्यात खुपलं. गावातल्या पोराबरोबर तुझं जे काही प्रकरण सुरु आहे ते थांबव, अशी समजूत घरच्यांनी घातली. पण शुभांगी त्या मुलावर मनोमन प्रेम करत होती. तो ही तिच्यावर जीवापाड प्रेम करत होता. शुभांगी आपलं काही ऐकत नसल्याचं कुटुंबियांच्या लक्षात आलं. त्यांनी शुभांगीचं लग्न लावून द्यायचं ठरवलं. शुभांगीने देखील घरच्यांचं मन राखत लग्नाला होकार दिलं.

पण शुभांगी आपल्या आयुष्यात नसणार, ही कल्पनाच शुभांगीच्या मित्राला सहन होत नव्हती. त्याने शुभांगी ज्या मुलाबरोबर लग्न करणार होती, त्या नवऱ्या मुलाला शुभांगीबरोबरचे त्याचे फोटो दाखवले आणि आमच्या दोघांचं एकमेकांवर जीवापाड आहे, तू लग्न करु नको, असं बजावलं. त्यामुळे नवऱ्या मुलाकडील मंडळींनी सोयरीक मोडली.

हत्या करताना हात थरथरु नयेत म्हणून दारु प्यायली!

या सगळ्या घटनेचा राग शुभांगीच्या कुटुंबियांच्या मनात होता. शुभांगीला मारुन टाकण्याचा प्लॅन बाप आणि भावाने आखला. आठ दिवसांपूर्वी म्हणजेच रविवारी २२ जानेवारीला कुटुंबीयांनी शुभांगीचा रुमालाने गळा आवळून खून केला. शुभांगीचा गळा दाबताना आपले हात थरथरू नाही म्हणून वडील ,मामा आणि इतरांनी दारू प्यायली. दारू पिऊन डॉक्टर शुभांगीची गळा आवळून हत्या करण्यात आली. हत्येनंतर प्रेत रात्री उशिरा शेतात नेण्यात आले. ज्वारीच्या शेतात शुभांगीचे शरण रचून प्रेत जाळले.

एक कॉल आणि शुभांगीच्या हत्येचे बिंग फुटले!

सकाळ झाल्यानंतर तिच्या प्रेताची राख आणि अस्थी गोदावरी नदीत विसर्जित केल्या. यानंतर सर्व पुरावे नष्ट करण्यासाठी प्रेत जाळले त्याठिकाणच्या शेतजमिनीवर नांगर फिरवण्यात आला. त्यावर पाणी सोडून पुरावा नष्ट करण्याचा प्रयत्न करण्यात आला. पण शुभांगी दिसत नसल्याने गावातील काहींना संशय आला. गावातीलच कोणीतरी निनावी फोन पोलीस ठाण्याला करून घटनेची माहिती दिली आणि डॉक्टर शुभांगीच्या हत्येचे बिंग फुटले.

पोलिसांनी शुभांगीचे वडील जनार्धन जोगदंड, तिचा भाऊ कृष्णा जोगदंड,चुलत भाऊ गिरीधारी जोगदंड, गोविंद जोगदंड, आणि मामा केशव कदम आशा पाच जणांना अटक करण्यात आली असून न्यायालयात हजर केले असता न्यायालयाने ३ फेब्रुवारीपर्यंत पोलीस कोठडी सुनावली आहे.