Electricity Bill: 'कॉमन मॅन'चं बजेट कोलमडणार; वीजबिलासाठी जास्त पैसे मोजावे लागणार?

मुंबई: राज्यातील नागरिकांना नव्या वर्षात वीजदरवाढीचा 'शॉक' बसणार हे आता जवळपास निश्चित झाले आहे. महावितरण कंपनीने सरासरी २ रुपये ३५ पैसे प्रति युनिट वीज दरवाढीचा प्रस्ताव राज्य वीज नियामक आयोगापुढे सादर करण्याची तयारी केली आहे. या याचिकेवर अद्याप निर्णय होणे बाकी आहे. यानंतर राज्यात वीज महाग होऊ शकते. परंतु, येत्या काही दिवसांमध्ये राज्याच्या विविध भागांमध्ये स्थानिक स्वराज्य संस्थांच्या निवडणुका आहेत. त्यामुळे सत्ताधाऱ्यांकडून हा निर्णय लांबवण्यासाठी प्रयत्न होऊ शकतात. परंतु, त्यानंतर राज्यातील ग्राहकांना वीजदरवाढीचा शॉक बसणार, हे अटळ मानले जात आहे.
गेल्या काही काळात खर्चात वाढ झाल्याने महानिर्मिती कंपनीने सरासरी प्रति युनिट १.०३, तर महापारेषण कंपनीने ३२ पैसे असा एकूण १.३५ रुपये प्रति युनिट दरवाढीचा प्रस्ताव आधीच सादर केला आहे. तर अदानी इलेक्ट्रिसिटीकडून विदेशी कोळसा आयात करून वीजपुरवठा केल्याच्या मोबदल्यात २२ हजार ५०० कोटी रुपयांची मागणी करण्यात आली होती. त्यानंतर सर्वोच्च न्यायालयाने हे पैसे इंधन अधिभाराच्या माध्यमातून वसूल करण्याचे निर्देश दिले होते. त्यामुळे वीज ग्राहकांवर अगोदरच प्रति युनिट १.३० रुपयांचा बोजा पडला होता. गेल्यावर्षीच्या जून महिन्यापासून याची अंमलबजावणी सुरु झाली होती. आता या भाराचा समावेश करून महावितरण कंपनीने सरासरी प्रति युनिट २.३५ रुपये दरवाढीचा प्रस्ताव सादर करण्याची तयारी केली आहे.
महावितरणाकडून बहुवर्षीय दरनिश्चिती विनियमानुसार तिसऱ्या वर्षात नोव्हेंबर अखेरपर्यंत वीजदरासंदर्भात फेरआढावा घेण्यासाठी याचिका दाखल करण्यात येते. त्यानुसार महावितरणाकडून वीजदरवाढीचा प्रस्ताव मांडण्यात आला आहे. या निर्णयाला सामान्य नागरिकांकडून जोरदार विरोध होण्याची शक्यता आहे. राज्य वीज ग्राहक संघटनेने यासाठी आतापासूनच मोर्चेबांधणी सुरु केली आहे. राज्यातील सर्व वीज ग्राहकांनी प्रचंड संख्येने सूचना व हरकती नोंदवून करावे, असे आवाहन वीज ग्राहक संघटनेचे प्रताप होगाडे यांनी यानिमित्ताने केले आहे. ही दरवाढ प्रचंड असून, महानिर्मिती आणि महावितरण कंपनीतील भ्रष्टाचार आणि अकार्यक्षमतेचा भार सर्वसामान्य वीजग्राहकांवर टाकण्यात येऊ नये. त्यात राज्य सरकारने हस्तक्षेप करावा, अशी मागणीही प्रताप होगाडे यांनी केली.