कंटेनरला अपघात होताच रस्त्यावर कांद्याचा सडा; घमेलं, पिशव्या घेऊन फुकट्यांची गर्दी
बीड: पहाटे चारच्या सुमारास धुळे-सोलापूर राष्ट्रीय महामार्गावर मांजरसुंबा घाटाच्या पायथ्याशी कोळवाडी फाट्याजवळ कांदे वाहतूक करणारा कंटेनर रस्त्याच्या कडेला आदळल्याने अपघात झाला. या अपघातामुळे कंटेनरमधील कांदे रस्त्यावर पडले. त्यानंतर स्थानिकांनी कांदे लुटण्यासाठी रस्त्यावर गर्दी केली.
धुळे-सोलापूर राष्ट्रीय महामार्ग मांजरसुंबा घाटाच्या पायथ्याशी कंटेनरला झालेल्या अपघातामुळे कांदे रस्त्यावर पडले. एकीकडे अस्मानी सुलतानी संकटाशी शेतकरी झुंज देत आहे तर दुसरीकडे आलेल्या पिकाला योग्य भाव मिळत नसल्याने शेतकरी माल विकण्यासाठी अनेक जिल्ह्यांमध्ये धडपडत आहे. याच प्रयत्नात असलेल्या एका शेतकऱ्याचा कांदा धुळे-सोलापूर राष्ट्रीय महामार्गावर पडला. कंटेनरला अपघात झाल्याने आतमध्ये असलेला कांदा रस्त्यावर सांडला.
अपघातानंतर रस्त्यावर पडलेला कांदा स्थानिकांनी लुटून नेला. कांद्याचा कंटेनर अपघातग्रस्त होऊन त्यातील कांदा रस्त्यावर पडल्याचं समजताच स्थानिकांची झुंबड उडाली. पहाटे चारच्या सुमारास अपघात झाला. यानंतर कित्येक तास उलटूनही यंत्रणा मदतीला धावली नाही. स्थानिक रस्त्यावर धावले. मात्र त्यांना कांदा लुटून नेण्यात धन्यता मानली. रस्त्यावर पसरलेला कांदा भरुन देण्यासाठी मदत करा, असं आवाहन कंटेनर चालकानं केलं. मात्र स्थानिकांनी त्याला कोणताही प्रतिसाद दिला नाही. उलट रस्त्यावर पसरलेला कांदा स्थानिकांनी फुकटात लुटून नेला.