पुलावर चालताना अचानक वाहनाची धडक; अपघातात सहाय्यक पोलीस उपनिरीक्षकाच्या...

बीड : परळीत सुरू असलेली अपघातांची मालिका थांबता थांबत नसल्याचं चित्र आहे. शहरात आज सकाळी आणखी एक अपघात झाला असून अंबाजोगाई पोलीस ठाण्याचे सहाय्यक पोलीस उपनिरीक्षक राजेभाऊ शेळके यांच्या ७० वर्षीय आईचा अपघाती मृत्यू झाला आहे.

गेला काही दिवसांपासून परळीतील उड्डाणपूल परिसर हा मृत्यूचा सापळा बनला आहे. या ठिकाणी आतापर्यंत अनेक अपघात झाले आहेत. दोन दिवसांपूर्वीच याच पुलावर दोन युवकांचा अपघाती मृत्यू झाला होता. अशातच आज सकाळी ८ वाजता अंबाजोगाई ठाण्याचे सहाय्यक पोलीस निरीक्षक राजेभाऊ शेळके यांच्या आई प्रयागबाई बळीराम शेळके (वय वर्ष ७०) या उड्डाणपूल परिसरात चालत जात असताना एका अज्ञात वाहनाने त्यांना जोराची धडक दिली. या धडकेत प्रयागबाई या गंभीर जखमी झाल्या. त्यानंतर त्यांना उपचारासाठी तात्काळ रुग्णालयात दाखल करण्यात आलं. मात्र परळीतील उपजिल्हा रुग्णालयात डॉक्टरांनी तपासणीअंती त्यांना मृत घोषित केलं.

अपघातात मृत्युमुखी पडलेल्या प्रयागबाई बळीराम शेळके यांच्या पश्चात एक मुलगा, दोन मुली, सून, नातवंडे असा मोठा परिवार आहे. प्रयागबाई यांचं निधन झाल्याचं कळताच शेळके कुटुंबावर दुःखाचा डोंगर कोसळला असून परिसरात हळहळ व्यक्त केली जात आहे.

दरम्यान, या अपघातानंतर उड्डाणपूल परिसरात काही वेळासाठी मोठ्या प्रमाणात वाहतूक कोंडी झाली होती. पोलिसांनी दखल घेत वाहतूक सुरळीत केली. परळीत हा उड्डाणपूल अनेकांच्या मृत्यूचं कारण ठरत असल्याने या परिसरातील अपघात टाळण्यासाठी वाहनचालकांकडून या पुलावर वेगमर्यादेचं काटेकोर पालन व्हावं, यासाठी प्रशासनाने योग्य ती खबरदारी घ्यावी, अशी मागणी शहरातील नागरिकांकडून केली जात आहे.