६० वर्षीय व्यक्तीला डोक्यात दगड घालून संपवलं

लातूर : ऐन रंगपंचमीच्या दिवशी शहरातील एका व्यक्तीच्या डोक्यात दगड घालून त्याचा खून करण्यात आला आहे. या घटनेची माहिती मिळताच पोलिसांनी वेगात तपासाची चक्रे फिरवली अन् अवघ्या २४ तासात आरोपीला बेड्या ठोकल्या आहेत.

याबाबतची अधिक माहिती अशी की, लातूर शहरात रंगपंचमीच्या दिवशी सकाळपासूनच रंगांची मुक्त उधळण होत असताना शहरातील गांधी मार्केटमधील वेदिका लाईट हाऊस मच्छी मार्केटसमोर अंदाजे ५५ ते ६० वर्ष वय असलेला एक अनोळखी व्यक्ती मृतावस्थेत पडला असल्याची माहिती गांधी चौक पोलिसांना मिळाली. गांधी चौक पोलीस त्या माहितीच्या आधारे तत्काळ घटनास्थळी दाखल झाले. सदर मयत व्यक्ती हा लातूर शहरात कचरा गोळा करायचा आणि त्यावरच आपलं पोट भरायचा. तो स्वभावाने भोळसर होता. तो कोण आहे, कुठून आला याची कोणालाही माहिती नव्हती. मात्र गेल्या अनेक दिवसांपासून तो कचरा वेचताना अनेकांना दिसायचा. रविवारी सकाळी डोक्यात दगड घालून त्याचा खून झाल्याचे समोर आले.

पोलिसांनी या घटनेचा पंचनामा केला आणि मृतदेह शवविच्छेदनासाठी स्व. विलासराव देशमुख शासकीय वैद्यकीय महाविद्यालयात पाठवला. त्यानंतर पोलिसांनी तपासाची चक्रे फिरवून आरोपीचा शोध सुरू केला. लातूर शहरातीलच अवंती नगरमधील २३ वर्षीय अविनाश चव्हाण या भुरट्या चोरट्याने हा खून केल्याचा पोलिसांना संशय आला. पोलिसांनी त्याच्या घरी धाड टाकली. मात्र तो बस स्थानकाच्या पाठीमागे लपून बसल्याची माहिती पोलिसांना मिळाली. त्या माहितीच्या आधारे पोलिसांनी त्याला ताब्यात घेतले अन् पोलिसी खाक्या दाखवताच त्याने गुन्हा कबूल केला.

'मी चोरीच्या उद्देशाने त्याचा मध्यरात्री खिसा तपासला. त्यावेळी एका खिशात २० रुपयांची नोट सापडली, मात्र दुसरा खिसा तपासत असताना त्याला जाग आली, त्यामुळे आमच्या दोघांमध्ये झटापट झाली, यात आपली सोडवणूक करण्यासाठी बाजूला पडलेला दगड मी त्याच्या डोक्यात घातला. यातच त्याचा मृत्यू झाला. त्यानंतर तेथून मी पळ काढला,' अशी कबुली २३ वर्षीय आरोपीने पोलिसांकडे दिली.

दरम्यान, या प्रकरणी गांधी चौक पोलीस ठाण्यात अविनाश चव्हाण याच्यावर गुन्हा दाखल करण्यात आला आहे.