धक्कादायक! माजी सैनिकाने टोकाचा निर्णय घेत संपवले जीवन, कारण अस्पष्ट, लातूर शहरात खळबळ

 

लातूर : लातूर शहरातील पद्मानगरमधे मात्र एक खळबळजनक घटना समोर आली आहे. एका ४३ वर्षीय माजी सैनिकाने स्वत:च्या डोक्यात पिस्तुलाने गोळी घालून आपले जीवन संपवले. या घटनेची महिती मिळताच पोलीस घटनास्थळी दाखल झाले. या माजी सैनिकाचे नाव सुनील वैजनाथ कावळे असे असून ते मूळचे लातूर तालुक्यातील चिंचोली बल्लाळनाथ येथील रहिवासी आहेत. ते सध्या लातूर शहरातील पद्मानगर येथे नवभारत शाळेसमोर भाड्याच्या घरात राहत होते.

सुनील वैजनाथ कावळे हे दोन वर्षांपूर्वीच सेवानिवृत्त झाले होते. आज २४ जुलै रोजी सकाळी १० वाजताच्या दरम्यान सुनिल कावळे यांनी आपल्या राहत्या घरात टोकाचे पाऊल उचलत जीवन संपवले.

या घटनेची माहिती मिळताच एमआयडीसी पोलिस अधिकारी व कर्मचारी घटनास्थळी तत्काळ दाखल झाले. त्यांनी घटनेचा पंचनामा केला. त्यानंतर मयत माजी सैनिक सुनील कावळे यांचा मृतदेह शासकीय रुग्णालयात शवविच्छेदनासाठी पाठवण्यात आला आहे. या प्रकरणी एमआयडीसी पोलिस ठाण्यात गुन्हा दाखल करण्याची प्रक्रिया सुरु आहे.

घटनेने उडाली एकच खळबळ

दोन दिवसावर कारगील विजय दिवस येऊन ठेपलाय. सबंध देश हा दिवस साजरा करण्याच्या तयारीत असताना देशाची सेवा केलेल्या एका माजी सैनिकाने असा टोकाचा निर्णय घेत स्वत:चं आयुष्य का संपवलं असेल याचा तपास पोलीस करतीलच. मात्र या घटनेने पद्मानगरमध्ये एकच खळबळ उडाली असून हळहळ व्यक्त केली जात आहे.