निम्मा ऑक्टोबर संपला तरी धान्य नाही, वितरण कधी आणि कसे करायचे, स्वस्त धान्य विक्रेत्यांसमोर प्रश्न

 






निम्मा ऑक्टोबर संपला तरी धान्य नाही, वितरण कधी आणि कसे करायचे, स्वस्त धान्य विक्रेत्यांसमोर प्रश्न


पुणे: संबंधित महिन्याचे धान्य त्याच महिन्यात घेण्याचे आदेश राज्य सरकारने जारी केले आहेत. असे असूनही पुण्यातील सुमारे २० टक्के स्वस्त धान्य दुकानांमध्ये अद्याप धान्य पोहोचलेले नाही. त्यामुळे अर्धा ऑक्टोबर उलटून गेल्यानंतरही धान्य कधी मिळणार आणि त्याचे वितरण कधी होणार, असा प्रश्न स्वस्त धान्य विक्रेत्यांना सतावत आहे. धान्य मिळण्यासाठी आणखी काही दिवसांची प्रतीक्षा करावी लागणार असल्याचे सांगण्यात येत आहे.
गेले काही महिने राज्यातील स्वस्त धान्य विक्रेत्यांकडे संबंधित महिन्याची खरेदी करण्यासाठी ग्राहक येत नसत. महिना उलटून गेल्यानंतर खरेदी करण्याचे प्रमाण अधिक होते. त्यामुळे अनेकदा काहींनी धान्य घेतले नाही, तरीही विक्रेते खरेदीची नोंद करीत होते, असे अधिकारी सांगतात. त्यामुळे धान्यातील काळाबाजार रोखण्याचे मोठे आव्हान अन्न व नागरी पुरवठा विभागासमोर होते. या पार्श्वभूमीवर संबंधित महिन्यातच धान्य खरेदी करण्याचा आदेश जारी करण्यात आला.

एका महिन्यात वितरित केलेल्या धान्याच्या कोट्यानुसार पुढील महिन्याचा धान्याचा कोटा निश्चित केला जाईल. त्यानुसार धान्य वितरित करण्याचा निर्णय सरकारने घेतला आहे. सप्टेंबरपासून हा निर्णय लागू करण्यात आला आहे. त्यामुळे स्वस्त धान्य विक्रेत्यांवर त्या त्या महिन्याचे धान्य त्याच महिन्यात वितरण करण्याचे बंधन आले आहे. त्यानुसार, ऑक्टोबरच्या पहिल्या तारखेला धान्य वितरण सुरू होणे अपेक्षित होते. मात्र, ऑक्टोबरचे पंधरा दिवस उलटून गेल्यानंतर शहरातील सुमारे सातशे विक्रेत्यांपैकी सुमारे २० टक्के विक्रेत्यांकडे धान्य अद्याप पोहोचलेले नाही.

ग्राहकांना मोठा फटका:

ऑक्टोबरचे दोन आठवडे उलटून गेल्यानंतरही धान्य दुकानात पोहोचलेले नाही. सुमारे २० टक्के दुकानांना धान्याची प्रतीक्षा आहे. १० टक्के दुकानांमध्ये गेल्या काही दिवसांत धान्य पोहोचले आहे. धान्य वेळेत न पोहोचल्याचा फटका विक्रेत्यांसह ग्राहकांना बसत आहे, असे रेशन दुकानदार संघटनेचे अध्यक्ष गणेश डांगी यांनी सांगितले.

गणेशोत्सवामुळे शहरात धान्य वितरणासाठी गाड्या पाठविता आल्या नाहीत. रस्ते बंद असल्यामुळे अनेक दुकानांमध्ये धान्य पोहोचवता आले नाही. मात्र, मंगळवारपर्यंत सर्व दुकानांत धान्याचे वितरण केले जाईल.

- दादासाहेब गीते, अन्नधान्य वितरण अधिकारी

प्रत्येक महिन्याचे धान्य त्याच महिन्यात वितरित करायचे असल्याने पहिल्याच दिवशी पॉस मशिनला माहिती द्यायला हवी. त्यानंतरच धान्यसाठ्याचे वितरण होईल. १० ऑक्टोबरला पॉस मशिन सुरू झाल्यानंतर, त्याचे वितरण कसे होणार हा प्रश्न आहे.

Post a Comment

Previous Post Next Post