नांदेडच्या 'या' मतदारसंघामध्ये सख्या बहीण-भावात अन् काका-पुतण्यात लढाई, कुणाला फटका बसणार?

नांदेडच्या 'या' मतदारसंघामध्ये सख्या बहीण-भावात अन् काका-पुतण्यात लढाई, कुणाला फटका बसणार?

 नांदेड : राज्यात अनेक ठिकाणी नातलगांमध्ये चूरशीची लढाई पाहायला मिळत आहे. नांदेड जिल्ह्यातील विधानसभा निवडणुकीत दोन ठिकाणी नात्यातच राजकीय वितुष्ट आले असून सख्या बहीण भावात आणि काका पुतण्यात राजकीय लढाई लागली आहे. हायव्होल्टेज असलेल्या लोहा मतदारसंघातून राष्ट्रवादी अजित पवार गटाकडून प्रतापराव पाटील चिखलीकर तर शेकापकडून त्यांचीची सख्खी बहीण निवडणुकीत एकमेकांच्या विरोधात उभे ठाकले आहेत. दुसरीकडे किनवट मतदार संघात शरद पवार गटाकडून प्रदीप नाईक तर त्यांचाच घरातील पुतण्या सचिन नाईक यांनी एकमेकांविरुद्ध दंड थोपटले आहेत.

लोहा मतदार संघ हा माजी खासदार प्रताप पाटील चिखलीकर यांचा बाल्लेकिल्ला म्हणून ओळखला जातो. या मतदार संघातून त्यांनी प्रतिनिधित्व देखील केले आहे. २०१९ मध्ये प्रतापराव पाटील चिखलीकर हे लोकसभेला गेल्याने त्यांनी आपले वजन दाजींच्या पारड्यात टाकले आणि २०१९ च्या विधानसभा निवडणूकीत चिखलीकर यांचे दाजी श्यामसुंदर शिंदे हे विजयी झाले. त्यांना १ लाख १ हजार ६६८ मते मिळाली होती. पण कालांतराने दोन्ही कुटुंबियांमध्ये राजकीय वितुष्ट निर्माण झाले आणि ते आजपर्यंत कायम असल्याच पाहायला मिळत आहे. नुकत्याच पार पडलेल्या लोकसभा निवडणुकीत पराभव झाल्यानंतर प्रताप पाटील चिखलीकर यांनी लोहा मतदार संघातून निवडणूक लढवण्याचा निर्णय घेतला. राष्ट्रवादी अजित पवार गटाकडून चिखलीकर हे निवडणुकीच्या रिंगणात आहेत. दुसरीकडे आमदार श्यामसुंदर शिंदे यांच्या पत्नी आशा शिंदे ह्या निवडणुकीच्या मैदानात उतरल्या असून भाऊ प्रतापराव यांच्याविरोधात दंड थोपटले आहेत. सख्या बहीण आणि भावामध्ये होत असलेली निवडणूकीकडे सर्वांच लक्ष लागलं आहे. या चुरशीच्या लढाईत कोण बाजी मारणार याकडे उत्सुकता लागली आहे.

एकेकाळी किनवट मतदार संघ हा प्रदीप नाईक यांचा बालेकिल्ला म्हणून ओळखला जायचा. या मतदार संघातून नाईक हे तीन टर्म आमदार होते. मात्र २०१९च्या निवडणुकीत त्यांचा पराभव झाला. भाजपाचे भीमराव केराम यांनी नाईक यांचा मोठ्या फरकाने पराभव केला. या मतदार संघात बंजारा समाजापाठोपाठ अदिवासी समाजाची संख्या अधिक आहे. यंदा भाजपकडून भीमराव केराम यांना पुन्हा संधी देण्यात आली आहे. तर शरद पवार यांच्या राष्ट्रवादीकडून प्रदीप नाईक निवडणूक लढवत आहेत. भीमराव केराम विरुद्ध प्रदीप नाईक या दोघांमध्येच लढाई होईल अशी चिन्हे होती. पण प्रदीप नाईक यांचा पुतण्या सचिन नाईक यांनी एन्ट्री केली आहे. अपक्ष म्हणून ते निवडणुकीच्या मैदानात उतरले आहे. विशेष म्हणजे सचिन नाईक हे मंत्री संजय राठोड यांचे सख्ये मेहुणे आहेत. संजय राठोड यांच्या माध्यामातून भाजपची ही खेळी आहे काय? अशी चर्चा मतदार संघात सुरु आहे. शरद पवार गटात राहून आपल्याला सहानुभूती मिळेल अशी चिन्हे असताना पुतण्या सचिन प्रदीप नाईक यांची चांगलीच डोकेदुखी वाढली आहे.