रात्रभरात महिला कोट्यवधींची मालकीण

वॉशिंग्टन: आयुष्यात अनेकदा आपल्याला सप्रायझेस मिळत असतात. कधी ते लहान लहान गोष्टींमध्ये असतात तर कधी ते इतके मोठे असतात की त्यावर विश्वास ठेवणंही कठीण होतं. असंच काहीसं एका महिलेसोबत झालं आहे. अनेकांना लॉटरी घेण्याचं व्यसन असतं, यामध्ये ते पूर्णपणे बर्बाद होतात तरी त्यांना लॉटरी लागत नाही. तर, काहीजणांचं नशीब इतकं चांगलं असतं की त्यांना अचानक लॉटरी लागते. अमेरिकेतील एका महिलेला जगातील सर्वात नशीबवान महिला म्हटलं जात आहे. कारण तिला काही दिवसात दोन वेळा जॅकपॉट लागला आहे.

तीन महिन्यात दोन लॉटरी जिंकल्या

केन्या स्लोन असं या महिलेचं नाव असून ती अमेरिकेच्या कॅरेलिना परिसरातील राहणारी आहे. तिला गेल्या वर्षी ऑगस्ट महिन्यात ८ कोटींची लॉटरी लागली होती. त्यानंतर तिला ऑक्टोबरमध्ये पुन्हा लॉटरी लागली. यामध्ये तिने १६ कोटी रुपये जिंकले. म्हणजे केन्या स्लोनने काहीच महिन्यात तब्बल २४ कोटी कमावले. त्यामुळे ती रातोरात कोट्यधीश झाली.

पहिले कधीही लॉटरीचं तिकीट खरेदी केलं नव्हतं

विशेष म्हणजे या महिलेने यापूर्वी कधीही लॉटरीचं तिकीट खरेदी केलं नव्हतं. २०२२ मध्ये तिने दोनवेळा लॉटरीचं तिकीट खरेदी केलं आणि दोन्ही वेळा तिला लॉटरी लागली. रात्रभरात तिचं नशीब पालटलं. म्हणून तिला आता जगातील सर्वात नशीबवान महिला म्हटलं जात आहे.

८०० रुपयांचं लॉटरी तिकीट अन् जिंकले ८ कोटी

ही महिला मॅकडोनल्ड्समध्ये मॅनेजर म्हणून काम करते. स्लोन यांनी फक्त ८०० रुपयांना त्यांचं पहिलं लॉटरीचं तिकीट खरेदी केलं होतं. त्यातून त्यांना ८ कोटींची लॉटरी लागली होती. जेव्हा स्लोन यांनी याबाबत आपल्या कुटुंबाला सांगितलं तेव्हा कोणालाही यावर विश्वास झाला नाही. या घटनेने त्यांच्या कुटुंबात आनंदाचं वातावरण आहे. दुसऱ्या लॉटरीतून स्लोन यांना टॅक्स आणि इतर चार्जेस कापून १२ कोटी रुपये मिळाले आहेत.

केन्या हॉटेल व्यवसाय सुरु करणार

केन्या स्लोनला जेव्हा पहिली लॉटरी लागली तेव्हा त्यातून तिने जमीन खरेदी केली. तिला येथे तिचं घर बनवायचं आहे. तक दुसऱ्या लॉटरीच्या पैशांनी तिला स्वत:चं हॉटेल उघडण्याचा विचार करत आहे. तर इतर पैसे ती तिच्या कुटुंबावर खर्च करणार आहे.