छत्रपती संभाजीनगरमध्ये झालेल्या राड्यामध्ये एकाचा मृत्यू; गोळी लागल्याने सुरु होते उपचार

छत्रपती संभाजीनगर : किराडपुरा येथे जमावाकडून पोलिसांवर हल्ले होत असताना, पोलिसांनी गोळीबार सुरू केला. या गोळीबारात फैज कॉम्प्लेक्स मध्ये बंद गेटच्या मागे उभे असलेल्या शेख मुनीरोद्दीन (वय ४५, रा. ह. मु. फैज कॉम्प्लेक्स) यांना गोळी लागली. या गोळीबारात जखमी झाले होते. उपचारादरम्यान शेख मुनीरोद्दीन यांचा मृत्यू झाला.

शेख मुनिरोद्दीन मूळचे बीड जिल्ह्यात राहणारे आहेत. त्यांचे आई-वडील संजय नगर, बायजीपुरा भागात राहात होते. मुनिरोद्दीन फैज कॉम्प्लेक्स येथे भाड्याने राहत होते. त्यांना दोन मुले असून, किराडपूरा रस्त्यावर उसळलेल्या दंगलीत काही दंगलखोर फैज कॉम्प्लेक्सच्या गेटकडे धावून येत होते. शेख मुनिरोद्दीन आणि त्यांच्यासोबत असलेले काही जण या युवकांना कॉम्प्लेक्सच्या गेटपासून हाकलत होते. या जमावाला पांगविण्यासाठी पोलिसांनी केलेल्या गोळीबारात शेख मुनिरोद्दीन यांना गोळी लागली. गोळी लागल्यानंतर ते जमिनीवर पडले. ही धुमश्चक्री सुरू असताना, शेख मुनिरोद्दीन यांच्या मुलांनी त्यांना दुचाकीवर टाकून एमजीएम हॉस्पिटलला उपचारासाठी नेले.

या प्रकरणात एमजीएम हॉस्पीटलचे वैद्यकीय अधिक्षक डॉ. एच.आर. राघवन यांनी दिलेल्या माहितीनुसार, ‘गुरुवारी सकाळी पाच वाजेच्या दरम्यान मुनिरोद्दीन यांना रुग्णालयात दाखल करण्यात आले. त्यांच्यावर सकाळी सात ते आठ वाजण्याच्या दरम्यान शस्त्रक्रिया करण्यात आली. शेख मुनीरोद्दीन यांच्या पोटात ही गोळी लागली होती. त्यांच्यावर उपचार सुरू असताना सायंकाळी ७.३० वाजेच्या दरम्यान त्यांचा उपचारादरम्यान मृत्यू झाला.’