लाडक्या बहि­णींना मिळणार १ लाखापर्यंत कर्ज

 लाडक्या बहि­णींना मिळणार १ लाखापर्यंत कर्ज

मुंबई : प्रतिनिधी
गेल्या विधानसभा निवडणुकीत लाडकी बहीण योजना महायुतीसाठी गेमचेंजर ठरली होती. महाविकास आघाडीचे वारे राज्यात असताना महायुतीला मोठे यश मिळाले. या योजनेंतर्गत लाखो पहिला थेट सरकारशी जोडल्या गेल्या आहेत. दरम्यान आता या योजनेचा लाभ घेणा-या महिलांना १ लाखापर्यंत कर्ज मिळणार आहे. ते पण शून्य टक्के व्याजाने.

या योजनेचा लाभ घेणा-या मुंबईतील महिलांना शून्य टक्के दराने १ लाख रुपयांपर्यंतचे कर्ज उपलब्ध करून देण्यात येणार आहे. योजनेचा लाभ घेणा-या महिलांना मुंबई बँक मदतीचा हात देणार असून शून्य टक्के व्याजदराने कर्जपुरवठा केला जाणार आहे.

लाडक्या बहिणींचे पैसे उद्योग-व्यवसायांच्या माध्यमातून बाजारात आले पाहिजेत, अशी मुख्यमंत्री देवेंद्र फडणवीस यांची इच्छा होती. त्यामुळे, लाडकी बहीण योजनेचा लाभ घेणा-या महिलांना ९ टक्के व्याजदराने देण्यात येणारे कर्ज शून्य टक्के व्याजदराने मिळणार आहे. शासनाच्या ४ महामंडळातील विविध योजनांमधून ही सवलत देण्यात येणार आहे, अशी माहिती मुंबई बँकेचे अध्यक्ष प्रवीण दरेकर यांनी दिली.

राज्य सरकारच्या ४ महामंडळांच्या योजनांमधून १२ टक्क्यांपर्यंतच्या व्याजाचा परतावा दिला जातो. पर्यटन महामंडळाची आई योजना आहे. या योजनेतून महिलेला १२ टक्क्यांपर्यंत व्याजाचा परतावा दिला जातो. यासह, भटक्या-विमुक्तांसाठीचे महामंडळ, ओबीसी महामंडळ, अण्णासाहेब आर्थिक विकास महामंडळाच्या योजनांमधून व्याजाचा परतावा महिलांना दिला जातो. ज्या महिलांना कर्जपुरवठा केला जात आहे, त्या लाभार्थी महिला या योजनेत बसत असतील, तर या महिलांना शून्य टक्के व्याजदरात कर्ज उपलब्ध करून दिले जाऊ शकते, असेही त्यांनी म्हटले आहे.

एका महिलेला १ लाखापर्यंत कर्ज मिळू शकते आणि ५-१० महिला एकत्र येऊन स्वत:चा व्यवसाय करू शकतात. मुख्यमंत्री देवेंद्र फडणवीस यांच्यासमवेत चारही महामंडळांचे संचालक व संबंधित खात्याचे सचिव आणि अतिरिक्त सचिवांसोबत बैठक झाली. या बैठकीत हा निर्णय घेण्यात आला.

मुख्यमंत्र्यांनी तसे आदेशही दिले आहेत, अशी माहिती प्रवीण दरेकर यांनी एका मराठी वृत्तवाहिनीशी बोलताना दिली आहे. तसेच स्वयंपुनर्विकास हाऊसिंगचे ज्या पद्धतीने केले, त्याच पद्धतीने मुंबईतील महिलांना या योजनेचा लाभ मिळेल. लाडकी बहीण योजनेचा लाभ घेणा-या १२ ते १३ लाख महिला लाभार्थी असून १ लाखाच्या आसपास मुंबई बँकेकडे सभासद आहेत, अशी माहिती त्यांनी दिली.