टिपू सुलतान जयंतीच्या मिरवणुकीत धक्कादायक घटना;

जालना : जालना जिल्ह्यातील अंबड शहरात टिपू सुलतान जयंतीनिमित्त काढण्यात आलेल्या मिरवणुकीमध्ये सैन्य दलातील सुट्टीवर आलेल्या एका कर्मचाऱ्याने आकाशाच्या दिशेने पिस्तूल रोखून डान्स केला. या घटनेमुळे काही काळ नागरिकांमध्ये भीतीचं वातावरण निर्माण झाल्याने धावपळ उडाली. काही सुजाण नागरिकांनी हा प्रकार पोलिसांच्या लक्षात आणून देताच पोलिसांनी तत्काळ आरोपीला ताब्यात घेऊन त्याच्याकडील पिस्तूल जप्त केले आहे. याप्रकरणी अंबड पोलिसात गुन्हा दाखल करण्यात आला आहे.

मिळालेल्या माहितीनुसार, टिपू सुलतान मिरवणुकीच्या दरम्यान शेख बिलाल शेख दिलावर (रा. महेबूबनगर,अंबड) या सैन्यदलातील कर्मचाऱ्याने एका व्यक्तीच्या खांद्यावर बसून पिस्तूल बाहेर काढत आकाशाने दिशेने रोखले. यासंदर्भात विष्णू चव्हाण यांनी दिलेल्या फिर्यादीवरून अंबड पोलीस ठाण्यात गुन्हा दाखल करण्यात आला आहे. लोकांच्या मनात भीती निर्माण व्हावी, या उद्देशाने हा स्टंट केला असल्याचं पोलिसांनी नमूद केलं आहे.

दरम्यान, मिरवणुकीत अनुचित प्रकार होऊ नये म्हणून पोलिसांनी पिस्तूल दाखवणाऱ्या व्यक्तीवर तात्काळ कारवाई करत त्यास ताब्यात घेतलं आहे. शस्त्र बाळगणारा शेख बिलाल शेख दिलावर हा भारतीय सैन्यात नोकरीस असल्याचे सांगण्यात आले आहे. सैन्य दलातील जवानाने सार्वजनिक मिरवणुकीत असं कृत्य केल्याने संताप व्यक्त केला जात आहे. याप्रकरणी पोलिसांकडून अधिक तपास करण्यात येत आहे.

VIDEO : जालना जिल्ह्यातील अंबड शहरात टिपू सुलतान जयंतीच्या मिरवणुकीत धक्कादायक घटना; सैन्य दलातील व्यक्तीने नाचताना पिस्तूल आकाशाच्या दिशेने रोखलं. pic.twitter.com/LMmY1mJiZy

— Maharashtra Times (@mataonline) November 22, 2022