नदीचं पाणी आटलं अन् डोळे-तोंड असलेल्या आकृत्या दिसल्या, प्राचीन रहस्य उलगडणार

ब्राझिलिया: २००० वर्षे जुने मानल्या जाणार्‍या अ‍ॅमेझॉन रेनफॉरेस्टमध्ये मानवी चेहऱ्याचे विचित्र कोरीवकाम आढळून आले आहे. वर्षानुवर्षे निग्रो नदीच्या (Negro River) पाण्याखाली गेलेल्या खडकांवर ही आकृती आढळून आली आहे. आता दुष्काळामुळे ते पुन्हा एकदा जगासमोर आलं आहेत. यापूर्वी ही कलाकृती २०१० मध्ये पाहिली गेली होती आणि पण तेव्हा ते फक्त एका दिवसासाठी दिसले होते. जेव्हा शास्त्रज्ञांनी हे 'मानवी चेहरे' पाहिले तेव्हा ते थक्क झाले, आता ते त्यांचा अर्थ समजून घेण्याचा प्रयत्न करत आहेत आणि त्यांना आशा आहे की लवकरच यामागील प्राचीन रहस्य उलगडेल.

डेलीस्टारच्या वृत्तानुसार, रियो निग्रो आणि अ‍ॅमेझॉनची भेट जिथे होते त्या ब्राझीलच्या मनौसजवळ नदीच्या तळाशी हे प्राचीन मानवी चेहऱ्यांचे कोरीवकाम सापडले आहे. निग्रो नदी ही अ‍ॅमेझॉन नदीची उपनदी आहे, जिचा उगम कोलंबियामध्‍ये होतो. पुढे ती व्हेनेझुएला आणि नंतर ब्राझीलच्‍या अ‍ॅमेझॉनमधून वाहते, जिचे मुख मनौस शहरात आहे.

मानवी चेहऱ्यांप्रमाणेच, या कलाकृतींमध्ये पाणी आणि प्राणी देखील चित्रित केले आहेत. एन्शिएन्ट ओरिजिन्स (Ancient Origins) च्या अहवालानुसार, अलीकडच्या काळात ब्राझीलमध्ये नक्षीकाम सापडल्याची ही दुसरी घटना आहे. या आकृत्यांना ‘पेट्रोग्लिफ’ म्हणतात.

हे कोरीव काम काय दाखवतं?

तज्ज्ञांच्या मते, मानवी चेहऱ्यांचे हे नक्षीकाम कुऱ्हाडीने बनवले गेले असावे, ज्याचा आकार चौरस आहे. त्या सर्व आकृत्यांमध्ये चेहरा दाखवण्यात आला आहे, ज्याला तोंड आहे, तर काही चेहऱ्यांना नाक नाही. ब्राझिलियन इन्स्टिट्यूट ऑफ हिस्टोरिकल हेरिटेजचे जेम ऑलिव्हिरा यांनी सांगितले की, ही चित्रे 'कॉम्प्लेक्स ग्राफिक आर्ट' आहेत. कोरीवकामात आनंदी आणि दुःखी दोन्ही चेहरे आहेत. असे मानले जाते की ते शिकारी आणि शिकार यांचे प्रतिनिधित्व करतात.

मानवी चेहऱ्यांच्या या विचित्र कोरीव कामांमुळे शास्त्रज्ञ आश्चर्यचकित झाले आहेत आणि त्यांचा अर्थ समजून घेण्याचा प्रयत्न करत आहेत. असे मानले जाते की कोरीव काम अशा ठिकाणी केले गेले होते जिथे लोक राहत होते. ऑलिव्हेरा म्हणाले की आता आपण जे अनुभवत आहोत त्यापेक्षाही अधिक तीव्र दुष्काळाचा काळ प्राचीन अमेझोनियन लोकांनी सहन केला असेल.

पुढील महिन्यात रिओ निग्रोमधील पाण्याची पातळी वाढण्याची शक्यता आहे, ज्यामुळे ही कोरीव कामे पुन्हा पाण्याखाली जातील. त्यामुळे तज्ञ त्यांचे परीक्षण करण्यासाठी सर्व तपशील गोळा करत आहेत.