आत्मघातकी बॉम्बस्फोटात ३४ जणांचा मृत्यू १०० जखमी, 

 लाहोर : पाकिस्तानातील बलुचिस्तानमधील एका ठिकाणी झालेल्या आत्मघातकी बॉम्बस्फोटात ३४ जणांचा मृत्यू झाला आहे. प्राथमिक माहितीनुसार मृतांमध्ये पोलिसांचा देखील समावेश आहे. या घटनेत जवळपास १०० जण जखमी झाले आहेत. पाकिस्तानचं वृत्तपत्र डॉननं या संदर्भातील वृत्त दिलं आहे.

मास्तूंगचे सहायक कमिशनर अत्ताहुल मुनीम यांनी बलुचिस्तानमधील मस्तुंगमध्ये अल फलाह रोडवरील मदीना मशिदीच्या जवळ स्फोट झाल्याची माहिती दिली. हा स्फोट झाला तेव्हा ईद-ए-मिलादची मिरवणूक निघणार होती. त्यासाठी लोक जमा होत होते.

नबाब गौस बख्श रायसानी मेमोरिअल रुग्णालयाचे मुख्य कार्यकारी अधिकारी डॉ. सईद मीरवानी यांनी मृतांच्या संख्येला दुजोरा दिला आहे. सिटी स्टेशन हाऊस ऑफिशर मोहम्मद जावेद लेहरी यांनी या घटनेत एका पोलीस अधिकाऱ्याचा मृत्यू झाल्याचं म्हटलं आहे. हा बॉम्बस्फोट आत्मघातकी हल्ला होता. डीएसपी गिशकोरी यांच्या कारजवळ हा स्फोट झाल्याचं ते म्हणाले. या घटनेत नवाज गिशकोरी यांचा देखील मृत्यू झाला आहे.

बलुचिस्तानचे प्रभारी माहिती व प्रसारण मंत्री जान अचकजई यांनी बचावपथकांना मास्तुंगला पाठवल्याचं म्हटलं. गंभीर जखमींना क्वेटाला आणलं जात आहे. सर्व रुग्णालयांमध्ये आपत्कालीन स्थिती लागू करण्या आली आहे. विदेशी शक्तीच्या मदतीनं बलुचिस्तानमधील धार्मिक सहिष्णुता आणि शातता संपवण्याचा प्रयत्न असल्याचं जान अचकजई म्हणाले.

पाकिस्तानचे प्रभारी गृहमंत्री सरफराज अहमद बुगती यांनी या स्फोटात मृत्यू झालेल्यांप्रती संवेदना व्यक्त केल्या आहेत. दहशतवादाला कोणता धर्म किंवा आस्था नसते, असं ते म्हणाले.