नांदेड-पुणे एक्स्प्रेसच्या वेळेत महत्त्वाचा बदल; दक्षिण मध्यरेल्वेचे नवीन वेळापत्रक जाहीर, वाचा सविस्तर

छत्रपती संभाजीनगर: दक्षिण मध्य रेल्वेचे नवीन वेळापत्रक एक ऑक्टोबरपासून लागू केले जाणार आहे. या वेळापत्रकात नवीन बदल करण्यात आलेले आहेत. यात छत्रपती संभाजीनगर रेल्वे स्थानकावरून जालना नगरसोल आणि नांदेड पुणे एक्स्प्रेस या दोन रेल्वेचे वेळापत्रकात थोडा बदल करण्यात आला आहे.

विभागातील २४ रेल्वे स्थानकांवरील ८० गाड्यांच्या वेळा बदलण्यात आल्या आहेत. नवीन वेळापत्रकात एक ते दहा मिनिटांचा फरक आहे. यात मनमाड ते जालना मार्गावर धावणाऱ्या रेल्वेचे वेळापत्रक एक ते पाच मिनिटांनी कमी करण्यात आले आहे. बहुतेक रेल्वे सुटण्याची वेळ तीच ठेवण्यात आलेली आहे. यामुळे या रेल्वेतून प्रवास करणाऱ्या रेल्वे प्रवाशांना विविध स्थानकांवर एक ते आठ मिनिटे थांबावे लागणार आहे.

छत्रपती संभाजीनगर रेल्वे स्थानकावर जालना-नगरसोल विशेष पॅसेंजर रेल्वे सकाळी ७ वाजून ९ मिनिटांनी येत होती. ती एक ऑक्टोबरपासून ७.०८ दरम्यान स्थानकावर पोहोचणार आहे. निघण्याची वेळ पूर्वीप्रमाणे ७ वाजून १० मिनिटांचीच आहे. याशिवाय नांदेड-पुणे एक्स्प्रेस पूर्वी रात्री ८.३० ला स्थानकावर येत होती. तसेच ८.३५ ला निघत होती. ती ८.२० ला म्हणजे दहा मिनिट आधी पोहोचणार आहे. ती निघण्याची वेळ दहा मिनिटे आधी म्हणजेच ८.२५ ला पुण्याकडे निघेल.

नगरसोल स्थानकावर सात गाड्यांची वेळ बदलणार:

नवीन वेळापत्रकानुसार नगरसोल स्थानकावर सात गाड्यांची वेळ बदलणार आहे. यात नांदेड-मनमाड पॅसेंजर पूर्वी ४.२०ला येत होती. आता आठ मिनिटे उशिरा म्हणजे ४.२८ ला येईल. पूर्वीच्या वेळेनुसार निघणार आहे. दौंड ते निझामाबाद ही रेल्वे एक मिनिट आधी म्हणजे रात्री ११.२३ ला येणार आहे. निझामाबाद-पुणे एक्सप्रेसही सकाळी ९.५८ ला म्हणजे पूर्वीच्या वेळापत्रकापेक्षा एक मिनिटाआधी पोहोचणार आहे. रामेश्वरम ओखा तीन मिनिटे उशिरा येणार आहे. ही रेल्वे ११.३८ वाजता येणार आहे. हिसार हैदराबाद एक्स्प्रेस पूर्वी ५.३९ वाजता येत होती. ती आता ५.३५ ला येणार आहे. मनमाड-सिकंदराबाद रात्री ९.१८ वाजता येत होती. ती आता ९.१५ वाजता येईल. मनमाड-धर्माबाद पूर्वी ३.३४ ला येत होती. ती आता ३.३० ला नगरसोल स्थानकावर येणार आहे.

मराठवाड्यातील अन्य स्थानकावर बदल:

मराठवाड्यातील जालना, परतूर आणि सेलू येथे नांदेड पुणे एक्स्प्रेसची वेळ बदलणार आहे. ही रेल्वे दहा मिनिट आधी येईल. परभणी स्थानकावर नऊ गाड्यांच्या वेळापत्रकात पाच ते दहा मिनिटांचा बदल आहे. पूर्णा येथे १६ गाड्यांची वेळ काही मिनिटांसाठी बदलली आहे. चुडावा, लिंबगाव आणि वानेगाव येथे प्रत्येकी तीन, नांदेड येथे सात किनवट, मदनपूर, मुगट, पथरड येथे प्रत्येकी एक आणि मुदखेड येथे चार गाड्यांची वेळ बदलणार आहे.