आवक घटल्याने भाज्या कडाडल्या, टोमॅटो घसरला तर गवारने गाठली शंभरी, जाणून घ्या सध्याचे दर

बाजार समितीत भाज्यांची आवक प्रचंड विस्कळीत झाल्याने गेल्या दोन आठवड्यांपासून सर्वसामान्यांना दरवाढीचा फटका सहन करावा लागत आहे. बाजार समितीत गेल्या आठवड्याच्या तुलनेत जवळपास सर्वच भाज्या प्रतिकिलो दहा ते वीस रुपयांनी वधारल्या आहेत. इतर सर्वच भाज्यांचे दर वधारलेले असताना बाजार समितीत टोमॅटोचे दर मात्र काहीसे उतरल्याचे बघायला मिळत आहेत.

काही दिवसांपूर्वी जिल्हाभरात झालेल्या अवकाळी आणि गारपिटीमुळे भाजीपाला पिकांचे मोठे नुकसान झाले आहे. अशातच थंडी वाढल्याने उत्पन्नावरही परिणाम होत असल्याने बाजार समितीत भाज्यांची आवक जवळपास २५ ते ३० टक्क्यांपर्यंत कमी झाली आहे. अशातच नाशिकमधून मोठ्या प्रमाणात मुंबई आणि अन्य ठिकाणी भाजीपाला पाठविला जात आहे. त्यामुळे या सर्वांचा परिणाम भाज्यांच्या दरांवर होत असून, मागील दोन आठवड्यांपासून सातत्याने भाज्यांचे दर वाढत आहेत. एकीकडे डाळी आणि खाद्यतेलांच्या घसरणीमुळे नाशिककरांना दिलासा मिळत असला तरीही दुसरीकडे सातत्याने भाज्यांचे वाढणारे दर सर्वसामान्यांच्या तोंडचे पाणी पळवत आहे.

फळे उतरणीला

महिनाभरापूर्वी फळांची आवक काहीशी कमी असल्याने फळे प्रचंड महागली होती. मात्र, आता फळ बाजारात फळांचे दर काहीसे उतरणीला लागले आहेत. फळ बाजारात जवळपास सर्वच फळांचे दर २० ते ५० रुपयांनी उतरले आहेत. काही दिवसांपूर्वी जवळपास दोनशे रुपये किलोप्रमाणे विक्री होणार सफरचंदांचे दर आता १३० ते १५० रुपये किलोपर्यंत आले आहेत. याचबरोबर डाळींब १५० ते २०० रुपये किलो, पेरू ८० ते १००, चिकू ६० ते ८०, संत्री १०० ते १२० प्रतिकिलोप्रमाणे विक्री होत आहे.

बाजार समितीतीत दर असे (प्रतवारीनुसार/प्रतिकिलो)

भाजी जुने दर नवे दर

वांगी ४० ते ६० ५० ते ८५

टोमॅटो १० ते ४० ३ ते २५

शिमला मिरची ३० ते ४० ५० ते ८०

कारले ३० ते ४५ ३५ ते ६०

दोडका ३० ते ४० ५० ते ६०

गिलके ३० ते ३५ ४० ते ५०

भेंडी ३० ते ५० ५० ते ७५

गवार ७० ते १०० ७५ ते १२५

कांदा २० ते २५ १० ते १५

हिरवी मिरची ३० ते ५० ३५ ते ५०

मेथी (मोठी जुडी) १० ते ३० २० ते ४०

शेपु (मोठी जुडी) १० ते १५ १० ते २५

पालक (मोठी जुडी) ५ ते १० १० ते १५

कांदापात (मोठी जुडी) १५ ते ३५ २० ते ४०