पुणे : महाराष्ट्राचे राज्यपाल भगतसिंह कोश्यारी (Bhagatsingh Koshyari) यांनी केंद्रीय मंत्री नितीन गडकरी (Nitin Gadkari) यांची तुलना थेट छत्रपती शिवाजी महाराजांशी (Chhatrapati Shivaji Maharaj) केल्याने वाद निर्माण झाला आहे. छत्रपती शिवाजी महाराज तो पुराने जमाने के आदर्श है, अभी तुम्हारे सामने नितीन गडकरी जैसे आदर्श है, असं वक्तव्य राज्यपालांनी केलं होतं. यानंतर राज्यपालांवर जोरदार टीका होत आहे. राष्ट्रवादी काँग्रेसतर्फे राज्यभर आंदोलन करण्यात येत आहे. पुण्यात राष्ट्रवादीने आक्रमक होत डमी राज्यपालांचे धोतर फेडण्याचे अनोखे आंदोलन केले. राज्यपाल कोश्यारी यांच्या विधानाचा निषेध केला आहे.
राज्यपाल भगतसिंग कोश्यारी यांच्या वक्तव्याचा निषेध करण्यासाठी राज्यभर विरोधकांकडून आंदोलन करण्यात येत आहे. राष्ट्रवादी काँग्रेस सुद्धा आक्रमक होऊन राज्यभर आंदोलन करत आहे. पुण्यामध्ये राष्ट्रवादी काँग्रेसच्या कार्यकर्त्यांनी भगतसिंह कोश्यारी यांचे धोतर फेडणाऱ्यास १ लाख रुपयांचे बक्षीस ठेवले आहे.
आज पुण्यात शहर राष्ट्रवादी काँग्रेसच्या वतीने स्वारगेट येथील सावरकर पुतळ्याजवळ राज्यपाल भगतसिंग कोश्यारी यांच्या वक्तव्याचा निषेध करण्यासाठी आंदोलन करण्यात आले. यावेळी राष्ट्रवादी काँग्रेसने राज्यपाल भगतसिंग कोश्यारी यांचा डमी आणत त्यांना उठाबश्या काढायला लावल्या. तसंच या डमीचं धोतर फेडत अनोख्या पद्धतीने आंदोलन केलं आहे.
पंतप्रधान नरेंद्र मोदी, गृहमंत्री अमित शहा, उपमुख्यमंत्री देवेंद्र फडणवीस यांना आम्हाला सांगायचे आहे की, हा महाराष्ट्र कालही छत्रपतींचा होता आजही छत्रपतींचा आहे आणि उद्याही छत्रपतींचा राहील. मात्र भाजपची लाचारी पत्करलेल्या मुख्यमंत्र्यांना सावरकरांचा अपमान दिसतो पण छत्रपतींच्या अपमानावर ते सोयीस्कर मौन बाळगून आहेत. हे महाराष्ट्राचे दुर्दैव आहे अशी टीका यावेळेस राष्ट्रवादी काँग्रेसचे शहराध्यक्ष प्रशांत जगताप यांनी केली आहे.
दरम्यान, महाराष्ट्राच्या शिवप्रेमींची तुम्ही परीक्षा बघू नका. राज्यपालांची जर पुढच्या दोन दिवसात बदली केली नाही तर या महाराष्ट्रातील शिवप्रेमी राज्यपाल जिथं दिसतील तिथे त्यांचं धोतर फेडतील. याची सर्वस्वी जबाबदारी केंद्र आणि राज्य सरकारची राहील असा इशारा प्रशांत जगताप यांनी दिला आहे.
No comments:
Post a Comment