स्कूल बस - एसटी बसची समोरासमोर धडक;

 परभणी : परभणीच्या गंगाखेड शहरातील संत जनाबाई विद्यालयाच्या स्कूल बसचा आणि एसटी बसची समोरासमोर धडक होऊन भीषण अपघात झाला आहे. या अपघातामध्ये २० पेक्षा अधिक जण जखमी झाले आहेत. त्यांच्यावर गंगाखेड उपजिल्हा रुग्णालयात उपचार सुरू आहेत. चार जणांची प्रकृती गंभीर असल्याने त्यांना पुढील उपचारासाठी परभणी येथे नेण्यात आले आहे. हा अपघात गंगाखेड सावरगाव रोडवरील खंडाळी गावाजवळ झाला आहे. घटनेची माहिती मिळताच पिंपळदरी पोलिसांनी घटनास्थळी धाव घेतली.

गंगाखेड शहरातील संत जनाबाई विद्यालयाची स्कूल बस विद्यार्थ्यांना घेऊन चाकूरकडे जात होती. गाडी गंगाखेड तालुक्यातील खंडाळी गावाजवळ आली असता अहमदपूर वरून बुलढाण्याला जाणाऱ्या एसटी बसचा आणि स्कूल बसचा समोरासमोर भीषण अपघात झाला. या अपघातामध्ये स्कूल बसमधील विद्यार्थी आणि एसटी बसमधील २० पेक्षा अधिक प्रवासी जखमी झाले आहेत. घटनेची माहिती मिळतात पिंपळदरी पोलिसांनी घटनास्थळी धाव घेऊन जखमींना उपचारासाठी गंगाखेड येथील उपजिल्हा रुग्णालयामध्ये नेण्यात आले आहे.

या ठिकाणी वैद्यकीय अधीक्षक डॉक्टर हेमंत मुंडे, वैद्यकीय अधिकारी डॉक्टर स्वाती मुंडे, डॉक्टर केशव मुंडे, डॉक्टर योगेश मल्लुरवार आणि रुग्णालयाच्या परिचारिकांनी अपघातामध्ये जखमी झालेल्या जखमींवर उपचार केला. अपघातात जखमी झालेल्या चार जणांची प्रकृती गंभीर असल्याने त्यांना पुढील उपचारासाठी परभणी येथे नेण्यात आले आहे. अशी माहिती गंगाखेड उपजिल्हा रुग्णालय प्रशासनाकडून देण्यात आली आहे.

बसचा चालक अडकला गाडीमध्ये

स्कूल बस आणि महाराष्ट्र राज्य परिवहन महामंडळाच्या गाडीचा अपघात झाल्यानंतर एसटी बसचा चालक हा केबिनमध्ये अडकला होता. पिंपळदरी पोलिसांनी आणि नागरिकांनी शर्तीचे प्रयत्न करून चालकाला बाहेर काढले आहे. त्याला उपचारासाठी गंगाखेड येथील उपजिल्हा रुग्णालयामध्ये दाखल केले जाणार असल्याचे सांगण्यात आले आहे. या अपघातामुळे एकच खळबळ उडाली आहे.

चालकाने दारू पिल्याचा संशय
अहमदपूवरून बुलढाण्याकडे जाणाऱ्या महाराष्ट्र राज्य परिवहन महामंडळाच्या एसटी बसच्या चालकाने मद्य सेवन केलं असल्याचा प्राथमिक संशय आहे. त्यामुळेच हा अपघात झाल्याची शक्यता वर्तवली जात आहे. चालकाचे वैद्यकीय तपासणी केल्यानंतर चालक दारू पिलेला आहे की नाही याची माहिती समोर येणार आहे.