सोन्याने आजवरचे सर्व रेकॉर्ड मोडले, किंमती सर्वकालीन उच्चांकावर; पाहा तुमचा खिसा किती रिकामा होईल

नवी दिल्ली: लग्नसराईचा हंगाम सुरू होण्यापूर्वीच सोन्याच्या दरात वाढ होत आहे. मौल्यवान सोनं आता सर्वसामान्यांना परवडण्यापलीकडे गेले आहे. देशातील सोन्याच्या किंमतींनी आतापर्यंतच्या उच्चांकी पातळी गाठली असून, सोने आता सर्वकालिक उच्च पातळीवर चमकत आहे. आजच्या व्यापार सत्रात एमसीएक्सवर सोन्याने ५६ हजार ५०० रुपयांची पातळी गाठली.


सोन्याचा आजचा भाव
सोन्याचा भाव आज विक्रमी उच्चांकावर पोहोचला आहे. मल्टी कमोडिटी एक्सचेंजवर (एमसीएक्स) आज सकाळी सोन्याचा भाव ५६,५०१ रुपये प्रति १० ग्रॅमवर पोहोचला. अशा प्रकारे बाजार उघडताच सकाळी सोन्याने ५६,५०० रुपयांची विक्रमी पातळी गाठली. सध्या सोन्याचा भाव ५६,५४० रुपये प्रति १० ग्रॅमवर व्यवहार करत असून ५६ हजार ५४६ रुपये प्रति १० ग्रॅमचा आजच्या दिवसाचा उच्चांक आहे. सोन्याचा भाव सध्या २१६ रुपये किंवा ०.३८ टक्क्यांनी वाढून ५६,५४० रुपये प्रति १० ग्रॅमवर ट्रेड करत आहे.

चांदीही वधारली
सोन्याव्यतिरिक्त चांदीची चमकही वाढली आहे. एमसीएक्सवर चांदीने आज ७० हजार रुपयांची पातळीही ओलांडली. आजच्या सकाळच्या व्यापार सत्रात मल्टी कमोडिटी एक्सचेंजमध्ये चांदी ६१८ रुपये किंवा ०.८९ टक्क्यांनी वाढून ७०,०४५ रुपये प्रति किलोच्या पातळीवर व्यवहार करत आहे.


सोन्या-चांदीच्या दरवाढीचे कारण
सोनं आणि चांदीच्या दरात विक्रमी वाढ होताना दिसत असून नवीन वर्षाच्या सुरुवातीपासून किमतीत तेजी कायम आहे. विदेशी बाजारात मागणी वाढल्यामुळे भारतीय बाजारात सोन्याच्या दरात मोठी उसळी पाहायला मिळत आहे. याशिवाय किमती अशाच वाढत राहिल्या तर या वर्षी मार्चपर्यंत सोने आणि चांदी सर्वकालिक पातळीवर पोहोचतील, असे तज्ज्ञांचे मत आहे.


आंतरराष्ट्रीय बाजारातील किंमती

आंतरराष्ट्रीय बाजारातही सोने आणि चांदी हिरव्या चिन्हात व्यवहार करत आहेत. सोन्याच्या स्पॉट किंमतीत आज ०.२७ टक्क्यांनी वाढून १,९२५.६५ डॉलर प्रति औंसवर पोहोचली. त्याच वेळी, चांदीचा दर ०.७९ टक्क्यांनी वाढून २४.४६ डॉलर प्रति औंसवर व्यवहार करत आहे. गेल्या एक महिन्यात सोन्याच्या किमतीत ७.४५ टक्क्यांनी वाढ नोंदवण्यात आली असून याच दरम्यान, चांदीचा दर ५.५७ टक्क्यांनी वाढले.