कुख्यात अतिक अहमदच्या समर्थनार्थ बीडमध्ये झळकले पोस्टर्स

बीड : उत्तर प्रदेशमध्ये दोन दिवसांपूर्वी हत्या झालेल्या कुख्यात गुंड अतिक अहमद व त्याचा भाऊ अशरफ अहमद या दोघांच्या समर्थनार्थ बीडच्या माजलगाव शहरात भर चौकात बॅनर झळकवण्यात आले. या प्रकाराने संपूर्ण शहरात खळबळ उडाली होती. विशेष म्हणजे बॅनरवर या दोघांचा शहीद असा उल्लेख करण्यात आला होता. त्यामुळे तणावाचे वातावरण निर्माण होताच पोलीस प्रशासनाने हे बॅनर काढून टाकले आहेत.

कुख्यात गुंडांच्या हत्येनंतर शहरात बॅनर लागल्यानंतर याविरोधात विश्व हिंदू परिषदेच्या वतीने मोर्चा काढत निदर्शने करण्यात आली. तसंचं आरोपींविरोधात कारवाई करण्याची मागणी केली होती. या प्रकरणात माजलगाव पोलिसांनी आता दोन आरोपींना अटक केली आहे.

दरम्यान, उत्तर प्रदेशात अनेक गुन्हे दाखल असलेल्या अतिक अहमद व त्याच्या भावाची दोन दिवसांपूर्वी हत्या करण्यात आली होती. बहुजन समाज पक्षाचे आमदार राजू पाल यांच्या हत्याप्रकरणातील साक्षीदार उमेश पाल याची व त्याच्या संरक्षणासाठी तैनात असलेल्या दोन पोलिसांची २४ फेब्रुवारीला प्रयागराजमध्ये दिवसाढवळ्या हत्या करण्यात आली होती. या हत्येच्या आरोपाखाली समाजवादी पक्षाचा माजी आमदार अतिक अहमद, भाऊ अशरफ अहमद, मुलगा असद व साथीदार गुलाम यांच्याविरुद्ध गुन्हे दाखल झाले होते.

इतरही काही गुन्ह्यांसाठी गुजरातच्या साबरमती तुरुंगात असलेला अतिक व बरेलीच्या तुरुंगात असलेला अशरफ अहमद यांना या हत्येनंतर प्रयागराज तुरुंगात ठेवण्यात आले होते. त्यातच असद व गुलामचा एन्काऊंटर करण्यात आला होता. गुन्हेगारी पार्श्वभूमी असलेला अतिक उत्तर प्रदेशातून संसदेत निवडून गेला होता. त्याआधी पाच वेळा तो अलाहाबाद पश्चिम विधानसभा मतदारसंघातून पाचवेळा निवडूनही गेला होता. उत्तर प्रदेशात 'गँगस्टर अॅक्ट'अंतर्गत पहिलाच गुन्हा त्याच्यावर दाखल झाला होता. अतिकविरोधात गुन्हेगारी स्वरूपाचे तब्बल ७० गुन्हे दाखल होते.