कोल्हापुरात पुन्हा राडा, बाप्पाला निरोप देताना दोन मंडळात वाद, मध्यरात्री दगडफेकीत तीन जखमी, नेमका प्रकार काय?

कोल्हापूर: राज्यात सर्वत्र गणेश विसर्जनाची मिरवणुकांची धामधूम सुरू आहे. कोल्हापूरची मिरवणूक सर्वांच्या आकर्षणाचा केंद्रबिंदू ठरत असते. मात्र याच गणेश मिरवणुकीत ट्रॅक्टर ट्रॉली लावण्यावरून दोन मंडळांच्या कार्यकर्त्यांनी मध्यरात्रीच्या सुमारास तुफान राडा घातला. कार्यकर्त्यांनी एकमेकांच्या अंगावर जाऊन हाणामारी केली. एवढ्यावरच हे प्रकरण थांबलं नाही तर दोन्ही मंडळांच्या कार्यकर्त्यांनी दगडफेकही केली. यामध्ये देखावे पाहण्यासाठी आलेले दोघेजण आणि मंडळाचा एक कार्यकर्ता जखमी झाला असून घटना घडताच पोलिसांनी घटनास्थळी दाखल होत कार्यकर्त्यांना पांगवलं. हा सर्व प्रकार मध्यरात्रीच्या सुमारास कोल्हापुरातील खरी कॉर्नर परिसरात झाला असून यामुळे परिसरात तणावाचं वातावरण निर्माण झालं होतं.

कोल्हापुरात वाढत असलेली मंडळं आणि मिरवणुकीमुळे वाढत असलेली विसर्जन वेळ या सर्वांवर मार्ग काढत प्रशासनाने मुख्य पारंपरिक मार्गासह आणखी दोन मार्ग तयार केले आहेत. मात्र कोल्हापुरातील जुन्या मंडळ हे नेहमीच पारंपारिक मार्गावरून जात असतात. त्यामुळे मंडळांच्या वतीने एक दिवस अगोदर पासूनच ट्रॉली रांगेत लावण्यास सुरुवात होत असते. त्यानुसार आज गणेश विसर्जन असल्यामुळे काल बुधवारी संध्याकाळपासूनच मंडळाकडून तयारी सुरु करण्यात आली होती.

पीएम बॉईज आणि झुंजार क्लब या मंडळाच्या विसर्जन मिरवणुकीसाठी ट्रॉली लावण्यावरून वाद निर्माण झाला. एका मंडळाची ट्रॉली व कार्यकर्ते खरी कॉर्नरकडून मुख्य मार्गाकडे येण्याचा प्रयत्न करीत असतानाच खरी कॉर्नरजवळ थांबलेल्या दुसऱ्या मंडळाच्या कार्यकर्त्यांनी त्यांना थांबवण्याचा प्रयत्न केला. याच कारणातून वादाची ठिणगी पडली. या वादातून हाणामारी होऊन दगडफेकही झाली. त्यामुळे देखावे पाहण्यासाठी कुटुंबीयांसमवेत आलेले लोक वाट मिळेल त्या दिशेने धावू लागले.

यावेळी काही जणांनी दगडफेक केल्याने या दगडफेकीत तिघे जखमी झाले. या तिघांना खाजगी गाडीतून दवाखान्यात हलवण्यात आले. दरम्यान या घटनेची माहिती मिळताच पोलिसांनी घटनास्थळी धाव घेत खाकी वर्दीचा दणका दिला आणि कार्यकर्त्यांना पांगवले. तर खरी कॉर्नरकडे जाणाऱ्या मार्गावर पोलिस गाडी लावून दंगा करणाऱ्या कार्यकर्त्यांना समजावण्याचा प्रयत्न करत मध्यम मार्ग काढून हा वाद मिटवला. मात्र रात्रीपासून खरी कॉर्नर परिसरात तणावपूर्ण वातावरण निर्माण झाले असून पोलिसांचा मोठा बंदोबस्त या परिसरात तैनात करण्यात आला आहे.

यावेळी काही जणांनी दगडफेक केल्याने या दगडफेकीत तिघे जखमी झाले. या तिघांना खाजगी गाडीतून दवाखान्यात हलवण्यात आले. दरम्यान या घटनेची माहिती मिळताच पोलिसांनी घटनास्थळी धाव घेत खाकी वर्दीचा दणका दिला आणि कार्यकर्त्यांना पांगवले. तर खरी कॉर्नरकडे जाणाऱ्या मार्गावर पोलिस गाडी लावून दंगा करणाऱ्या कार्यकर्त्यांना समजावण्याचा प्रयत्न करत मध्यम मार्ग काढून हा वाद मिटवला. मात्र रात्रीपासून खरी कॉर्नर परिसरात तणावपूर्ण वातावरण निर्माण झाले असून पोलिसांचा मोठा बंदोबस्त या परिसरात तैनात करण्यात आला आहे.