एटीएम चोरुन नेलं, पिकअप चिखलात अडकला अन् मग.. हैराण करणारा चोरट्यांचा कारनामा

सोलापूर: अहमदनगर जिल्ह्यातील राशीन येथील दोशी पेट्रोल पंपा जवळील हिताची कंपनीचे एटीएम फोडून पैशाची चोरी झाली होती. संशयीत चोरटे चक्क एटीएम मशीनच घेऊन पसार झाले होते. चोरीत वापरलेले पिकअप वाहन आणि एटीएम मशीन सोलापूर जिल्ह्यातील माढा तालुक्यात बेवारस अवस्थेत आढळले. मंगळवारी सकाळी ग्रामस्थांनी पाहून पोलिसांना माहिती कळविली आणि अहमदनगर येथील चोरीची घटना सोलापुरात उघडकीस आली.

एटीएम मशीन पीकअपमधून घेऊन जाताना चिखलात पिकअप वाहन अडकल्याने संशयित चोरट्यांनी वाहन आणि फोडलेले एटीएम तसेच सोडून गेले. अहमदनगर येथील चोरीची घटना मंगळवारी सकाळी सोलापुरात उघडकीस आली. अहमदनगर येथील एटीएम फोडून माढा तालुक्यातील लोंढेवाडीजवळ आणून गॅस कटरच्या सहाय्याने फोडून एटीएममधील रक्कम लंपास केली.

एटीएम मशीन फोडून सर्व रोख रक्कम लंपास केली

चोरट्यांनी अहमदनगर येथून हिताची कंपनीचे एटीएम मशीन घेऊन पसार झाले होते. याबाबतची नोंद राशीन पोलिस ठाण्यात दाखल आहे. माढा तालुक्यातील लोंढेवाडीजवळ आले असता, संशयित चोरट्यांचे वाहन चिखलात अडकले. चिखलात पिकअप अडकल्याने चोरट्यांनी पिकअप जागेवर सोडून तेथून पळ काढला. एटीएम मशीन गॅस कटरच्या साह्यानं फोडून त्यातील सर्व रक्कम काढून लंपास केली.

बेवारस अवस्थेत एटीएम मशीन पाहून पोलिसांनी कळविले

मंगळवारी सकाळी लोंढेवाडी येथील ग्रामस्थांना पीकअप वाहन आणि एटीएम मशीन बेवारस अवस्थेत आढळून आले. ग्रामस्थांनी ताबडतोब याची माहिती माढा पोलिसांना कळविले. माढा पोलिस ठाण्याचे वरिष्ठ पोलिस अधिकारी आणि कर्मचाऱ्यांनी घटनास्थळी धाव घेतली. सोलापूर पोलिसांनी घटनास्थळी दाखल होऊन पंचनामा केला असून चोरट्यांचा शोध घेण्याचे काम सुरू आहे. सदरची घटना गंभीर असल्याने पोलिस अधीक्षक शिरीष सरदेशपांडे हेही घटनास्थळावर दाखल झाले होते. चोरट्यांच्या शोधासाठी विविध पथके तैनात केली आहेत. या घटनेत संशयित चौघांना पोलिसांनी ताब्यात घेतल्याची प्राथमिक माहिती समोर आली असून चोरटे हे सोलापूर जिल्ह्यातील असण्याची शक्यता पोलिसांनी वर्तविली आहे.