हिंदू-मुस्लिम ऐक्याचं प्रतिक, जव्हारच्या ऐतिहासिक शाही उरुसाला लाखोंची उपस्थिती, काय आहे परंपरा, वाचा सविस्तर

जव्हार: हिंदू आणि मुस्लिम ऐक्याचे प्रतिक असलेला हजरत अवलिया शहा सदरोद्दीन बदरोदिन चिश्ती (र. अ.) यांचा ५७१ वा उरुस, गुरुवार ते शनिवार या तीन दिवसांत जव्हारमध्ये मोठ्या जल्लोषात साजरा झाला. उरुसाच्या पहिल्या दिवशी जामा मशिद येथून भव्य मिरवणूक निघाली. मशिदीपासून पाचबत्ती नाका व नेहरू चौकातून पुन्हा दर्ग्याकडे येऊन पवित्र संदल वाटप करण्यात आले.

या महोत्सवात दुसरा दिवस महत्त्वाचा मानला जातो. दुसऱ्या दिवशी भव्य चादरीची जामा मशिदीपासून मोठ्या उत्साहात मिरवणूक निघाली. यामध्ये मुरीद व फकीर यांचा प्रामुख्याने सहभाग होता. त्यावेळी ठिकठिकाणी चौकात रातिफ करण्यात आला. हा सोहळा ढोल ताशे, नगारे यांच्या गजरात मोठ्या उत्साहात संपन्न झाला. पाचबत्ती नाका, पंडित नेहरू चौक, महात्मा गांधी चौक, तारपा चौक व परत दर्गाह असा मिरवणुकीचा प्रवास असतो. हजरत अवलिया शाह सदरोद्दीन चदरोद्दिन चिश्ती (र. अ.) यांच्या दर्ग्यावर सन्मानपूर्वक चादर चढविण्यात आली.

सर्वधर्मीय लोक यावेळी सहभागी झाले होते. फुलांच्या चादरी अर्पण केल्या गेल्या. त्यानंतर उर्स कमिटीतर्फे लंगरचे आयोजन करण्यात आले होते. या कार्यक्रमानंतर पहाटेपर्यंत चालणारा बहारदार कव्वालीचा कार्यक्रम मोठ्या उत्साहात पार पडला. कव्वालीस लाखोंच्या संख्येने चाहत्यांनी हजेरी लावली होती. यंदा कव्वाल जुनेद सुलतानी व गुलाम वारीस या कव्वालांनी देशभक्तीपर कव्वाली गायन करत उपस्थितांची मने जिंकली. दरम्यान, या रात्री जव्हार बस स्थानकातून सकाळपर्यंत जादा बसेसची व्यवस्था करण्यात आली होती. जव्हार व परिसरातील असंख्य मान्यवर मंडळी व आदिवासी बांधव मोठ्या संख्येने उपस्थित होते.

तिसऱ्या दिवशी, म्हणजे नवमीस सायंकाळी दर्ग्याचे मुजावर असिफ व आरिफ मुजावर यांच्या घरातून ख्वाजा पीर यांचा संदल निघाला. वाटपाचा कार्यक्रम श्रीमंत महेंद्रसिंग मुकणे राजेसाहेबांच्या उपस्थितीत झाला. दरवर्षीप्रमाणे आकाशपाळणे, वेगवेगळे खेळ, मौत का कुआ प्रदर्शने, विविध प्रकारचे स्टॉल, खेळण्यांची दुकाने मोठ्या संख्येने होती. उरुसाची वेगळी शान उरुसाची परंपरा हिंदू व मुस्लिम बांधव एकोप्याने पाळत असल्यामुळेच जव्हारच्या उरुसला ही आगळी वेगळी शान आहे. ऊर्स जल्सा कमिटी व सुन्नी मुस्लिम कमिटीच्या सदस्यांच्या मदतीने हा उत्सव हिंदू-मुस्लिमांनी एकत्रितपणे साजरा केला, अशी माहिती उर्स जलसा कमिटीचे अध्यक्ष अय्युब पठाण यांनी दिली.

हिंदू-मुस्लिम बांधव ऐक्याचं प्रतीक म्हणून जव्हारच्या उरुसाची वेगळी ओळख आहे. या महोत्सवात पोलिसांकडून चोख बंदोबस्त ठेवण्यात आला होता. १५० पोलिस कर्मचारी, २५ आरसीपी, ३० होमगार्ड आणि १७ अधिकारी नेमण्यात आले होते.
-शैलेश काळे, उपविभागीय पोलिस अधिकारी, जव्हार