काँग्रेसच्या रॅलीला 'लय भारी' प्रतिसाद; रितेश देशमुखांची हजेरी, तरुणाईत उत्साह

 काँग्रेसच्या रॅलीला 'लय भारी' प्रतिसाद; रितेश देशमुखांची हजेरी, तरुणाईत उत्साह

 

अमित देशमुख यांनी सांगता सभेत घेतला विरोधकांना चिमटा, शांत आणि सुरक्षित लातूरसाठी मतदान करण्याचे केले आवाहन

लातूरः प्रतिनिधी

प्रचाराचा शेवटचा दिवस काँग्रेस-महाविकास आघाडीच्या रॅलीने गाजला. लातूर शहर विधानसभा मतदारसंघाचे काँग्रेस-महाविकास आघाडीचे उमेदवार माजी मंत्री आमदार अमित विलासराव देशमुख यांच्या रॅलीला अभूतपूर्व प्रतिसाद मिळाला. अभिनेते रितेश देशमुख यांच्या उपस्थितीमुळे कार्यकर्ते, मतदारांमध्ये प्रचंड उत्साह दिसून आला. सुमारे तीन तास चाललेल्या या रॅलीत युवक, महिला, ज्येष्ठ नागरिक, व्यापारी, व्यावसायिक मोठ्या संख्येने सहभागी झाले होते. जागोजागी आमदार अमित देशमुख, रितेश देशमुख, खासदार डॉ. शिवाजी काळगे यांचा पुष्पहार खालून आणि फुलांचा वर्षाव करुन स्वागत करण्यात येत होते. अमित देशमुख आणि रितेश देशमुख हे नम्रतेने प्रत्येक व्यक्तीचे अभिवादन स्वीकारताना दिसले. यावेळी आमदार अमित देशमुख आणि रितेश देशमुख यांनी भाषण करुन रॅलीची सांगता हनुमान चौकात केली.

 

या रॅलीत खासदार डॉ. शिवाजी काळगे, माजी खासदार सुधाकर श्रंगारे, माजी महापौर दीपक सुळ, माजी महापौर स्मिता खानापुरे, लातूर शहर-जिल्हा अध्यक्ष अॅड. किरण जाधव, अॅड. उदय गवारे आदींसह पक्षाचे पदाधिकारी, कार्यकर्ते मोठ्यासंख्येने उपस्थित होते.

 

रॅलीची सुरुवात हनुमान चौक येथून झाली. पुढे रॅली हनुमान चौक-अक्षता-कापड लाईन,गोलाई (किंग कॉर्नर) -भुसार लाईन-सुभाष चौक (लोखंडे तेल दुकान), सुभाष चौक-अलंकार टॉकीज-जुनी कापड लाईन गंजगोलाई, गंजगोलाई मस्जिद रोड-साळे गल्ली-पॉवर हाऊस मागे-अण्णा भाऊ साठे चौक, अण्णा भाऊ साठे चौक- गंजगोलाई-छत्रपती शिवाजी महाराज रोड-सोना सेल्स, सोना सेल्स-गुळ मार्केट चौक, गुळ मार्केट चौक सराफ लाईन रोड- गंजगोलाई, गंजगोलाई-लोखंड गल्ली मधून कामदार रोड, कामदार रोड-हनुमान चौक येथे रॅलीचा समारोप करण्यात आला. प्रमुख नेत्यांच्या भाषणानंतर प्रचाराची सांगता झाली.

 

लातूरकरांना विजयाचा चौकार मारायचा आहे हे सांगत असताना आमदार अमित देशमुख यांनी काँग्रेसच्या पंचसूत्री कार्यक्रमाची माहिती उपस्थितांना दिली. आगामी काळात गंजगोलाईसाठी मास्टर प्लॅन करायचा आहे. लातूरचा विकास काँग्रेसने केला आहे. इतर कुठल्याही पक्षाने लातूरचा विकास केलेला नाही. लातूर काँग्रेसचा बालेकिल्ला आहे. काँग्रेस पक्षाशिवाय तुम्ही कोणालाच मतदान केलेले नाही. या महायुतीने महाराष्ट्राचे, लातूरचे वाटोळे केले आहे. लातूरमध्ये भ्रष्टाचार वाढला, गुंडगिरी वाढली, अवैध धंदे वाढले, दलालांचा सुळसुळाट वाढला आहे, अशी खंत त्यांनी व्यक्त केली.

 

अभिनेते रितेश देशमुख यांनी आमदार अमित देशमुख यांना प्रचंड मताधिक्याने निवडून देण्याचे आवाहन उपस्थितांना केले. यापूर्वी लातूरकरांनी लातूरचे नेतृत्व निवडून दिले. त्यानंतर ते मराठवाड्याचे नेते झाले. आता यापुढे ते महाराष्ट्राचे नेतृत्त्व करणार आहेत. त्यामुळे जास्तीत जास्त मतदान करण्याची काळजी घ्या. लातूरचा बिग बॉस तुमच्या प्रेमामुळे महाराष्ट्राचे नेतृत्त्व करेल, असा विश्वास त्यांनी यावेळी व्यक्त केला.

 

मतदानापूर्वी ट्रॅक रेकॉर्ड, बॅकग्राऊंड आणि मेरिट पाहा

लातूरकरांनी उमेदवाराचा ट्रॅक रेकॉर्ड, बॅकग्राऊंड आणि मेरिट पाहून मतदान करावे असे आवाहन आमदार अमित देशमुख यांनी केले. काँग्रेसच्या विरोधात जे उमेदवार उभे आहेत ते जामिनावर बाहेर आहेत, असा टोला त्यांनी लगावला. विरोधकांनी लुबाडले, फसवले, धमकावले, लुटले पण काँग्रेसने अशी कामे कधीच केली नाहीत. आता अशा प्रवृत्ती लातूरमध्ये वाढीस येणार नाहीत, याची खबरदारी प्रत्येकाने बाळगली पाहिजे. लातूरची संस्कृती स्वच्छ, पारदर्शक आणि कायद्याच्या चौकटीत असणारी ही संस्कृती असल्याचे त्यांनी यावेळी म्हटले. जिथे विषय गंभीर तिथे अमित देशमुख खंबीर असेही ते म्हणाले.

 

'लातूर अजेंडा २०२४-२९' चे हनुमान चौकात प्रकाशन

यावेळी आमदार अमित देशमुख, अभिनेते रितेश देशमुख, खासदार डॉ. शिवाजी काळगे आणि माजी खासदार सुधाकर शृंगारे यांच्या हस्ते वर्ष २०२४-२९ या येणाऱ्या पाच वर्षांसाठी लातूरसाठीचा 'लातूर अजेंडा २०२४-२९' हा वचननामा प्रकाशित करण्यात आला. लातूरकरांच्या सूचनांचा यात समावेश करण्यात आल्याची माहिती आमदार अमित देशमुख यांनी दिली. येत्या पाच वर्षात हा वचननामा पूर्ण करणार असल्याचे त्यांनी म्हटले.