पठाणच्या रविवारच्या कमाईवर विश्वास ठेवणं कठीण, पाचव्या दिवशी पठाणची ताबडतोब कमाई

मुंबई-करोना काळापासून बॉक्स ऑफिसवरजणू दुष्काळ पडला होता. अनेक चांगले सिनेमे येऊनही प्रेक्षक चित्रपटगृहात जात नव्हते. मात्र शाहरुख खानच्या 'पठाण' ने हा दुष्काळ संपवत बॉलिवूडला बॉक्स ऑफिसवर पुन्हा उभं राहण्याची नवी उमेद दिली. अलिकडच्या वर्षात एकापेक्षा जास्त सिनेमे लोकांनी साफ नाकारले आणि याचा सर्वातमोठा फटका निर्मात्यांना बसला.

अखेर शाहरुखच्या ‘पठाण’ सिनेमाची जादू बॉलिवूडला या भोवऱ्यातून बाहेर काढण्याच्या उपयोगी पडेल की नाही हे तर आगामी सिनेमाच्या कलेक्शनवरून कळेलच. 'पठाण'च्या पाचव्या दिवशी म्हणजेच रविवारी बॉक्स ऑफिसवर तुफान धुमाकूळ घातला. सिनेमाने ३०-४० कोटी नाही तर जवळपास ६५ कोटींची कमाई केली. अशाप्रकारे पाच दिवसांत 'पठाण'ने देशांतर्गत बॉक्स ऑफिसवर २७६.५ कोटींची कमाई केली.

पहिल्या दिवशी म्हणजेच बुधवारी बॉलिवूड सिनेमांचे सर्व रेकॉर्ड मोडणाऱ्या 'पठाण'ची जादू रविवारी पाचव्या दिवशीही दिसून आली. शाहरुख खान, जॉन अब्राहम आणि दीपिका पादुकोण यांच्या 'पठाण' सिनेमाला वीकेंड तसेच प्रजासत्ताक दिनाचा खूप फायदा झाला. बॉक्स ऑफिस इंडियाच्या अहवालानुसार, रविवारी, पाचव्या दिवशी सिनेमाने सुमारे ६५ कोटींची कमाई केली. 'पठाण' बुधवारी २५ तारखेला प्रदर्शित झाला, त्यामुळे सिनेमाला पाच दिवसांत वीकेंडचा जबरदस्त फायदा मिळाला.

पठाण बॉक्स ऑफिस कलेक्शन

पहिला दिवस- ५५ कोटी

दुसरा दिवस- ६८ कोटी

तिसरा दिवस- ३७.५० कोटी

चौथा दिवस- ५१ कोटी

पाचवा दिवस- ६५ कोटी

एकूण कमाई- २७६.५०

बॉक्स ऑफिसवर गेल्या सहा वर्षातील सर्वात मोठा सिनेमा

सिद्धार्थ आनंद दिग्दर्शित 'पठाण'ने तेलगु आणि तमिळमध्येही चांगली कमाई केली. शनिवारपर्यंत सिनेमाने या दोन्ही भाषांमध्ये ७.५ कोटींची कमाई केली. तर रविवारची कमाई २ कोटी रुपये आहे. अशाप्रकारे तमिळ आणि तेलगूनेही पहिल्या वीकेंडमध्ये जवळपास ९.५ कोटींची कमाई केली. अशाप्रकारे 'पठाण'ने पहिल्या वीकेंडमध्ये देशभरातील तीनही भाषांसह २८६ कोटी रुपयांचे कलेक्शन केले. गेल्या सहा वर्षात हा सिनेमा सर्वाधिक कमाई करणार्‍या बॉलिवूड सिनेमांच्या यादीत अव्वल स्थानी पोहोचला आहे.