नागपूरच्या शिवभक्ताने घरावरच उभारला शिवरायांचा पुतळा

नागपूर:छत्रपती शिवाजी महाराज यांच्या जयंती निमित्त विविध शहरांतील ढोल पथकांकडून वादन करून छत्रपती शिवाजी महाराज यांना अभिवादन करण्यात येत आहे. नागपूरच्या अनिल देशमुख या शिवप्रेमी तरूणानं एक वेगळाच आदर्श घालून दिलाय. त्यानं चक्क आपल्या घरावरच शिवाजी महाराजांचा १४ फुटांचा अश्वारूढ पुतळा उभारलाय. हातात तलवार घेऊन घोड्यावर स्वार झालेल्या छत्रपती शिवाजी महाराजांचा पुतळा उभारून शिवपूजन करीत शिवजयंती साजरी केलीय.

अनिल देशमुख याचं घर लोकांसाठी कुतूहल आणि अभिमानाचा विषय बनलंय. त्याच्या घरासमोरून जाणारा प्रत्येकजण अदबीनं झुकतो अन् नमस्कारही करतोय. हा नमस्कार असतोय छत्रपती शिवाजी महाराजांना. अनिल देशमुख हे हुडकेश्वर पिंपळ रोड येथे राहत असून त्यांचा एक ट्रान्सपोर्ट व्यवसाय आहे. अनिल यांनी आपल्या घरावरच छत्रपतींचा १४ फुटांचा सुंदर पुतळा बसवला आहे. शनिवारी ते छत्रपती शिवाजी महाराजांच्या पुतळ्याते पूजन करुन अभिवादन केले.

घरावर पुतळा उभारावं असं का वाटलं?

अनिल यांना लहानपणापासूनच छत्रपती शिवरायांचा इतिहास, व्यक्तीमत्व आणि विचारांविषयी प्रचंड आकर्षण आणि अभिमान होता. यातूनच घर बांधतांनाच शिवरायांचा पुतळा उभारण्याचा विचार त्याच्या मनात आला. सार्वजनिक ठिकाणच्या पुतळ्यांची होणारी आबाळही त्याने सातत्यानं पाहिलीय. त्याच्या या कृतीशील विचारांचा त्याचे शेजारी आणि मित्रांनाही अभिमान आहे.

तरुणांनी छत्रपती शिवाजी महाराजांच्या विचाराने मार्गक्रमण करावे . सर्वांनी वाद विवाद न करता आपल्या घरावरच पुतळा बसवावा. तरुणांनी छत्रपती शिवाजी महाराजांच्या विचाराने मार्गक्रमण करावे, असा संदेश पुतळा उभारून अनिल देशमुख यांनी दिला आहे.