वडिलांचा मृतदेह घरात ठेवून तुकारामने दिला गणिताचा पेपर, आईनेच परीक्षेला पाठवलं

सोलापूर : मंगळवेढा तालुक्यातील हुलजंती येथे हृदय पिळटून टाकणारी घटना घडली आहे. गणिताचा पेपर असल्याने बारावीच्या विद्यार्थ्यांने भरपूर तयारी केली होती. पण पेपरच्या दिवशीच म्हणजे आज सकाळी वडिलांचं आकस्मिक निधन झाल्याने विद्यार्थ्याच्या कुटुंबावर दुःखाचा डोंगर कोसळला होता. अखेर मन घट्ट करून मुलाने वडिलांचा मृतदेह घरात ठेवून आधी गणिताचा पेपर दिला अन् मग वडिलांच्या मृतदेहाला मुखाग्नी दिली. या घटनेने हुलजंती गावातील ग्रामस्थ हळहळ व्यक्त करत होते. तुकाराम कलप्पा रूपटक्के, असं विद्यार्थ्याचं नाव आहे. कलप्पा आबा रूपटक्के (वय ६० वर्ष) असं त्याच्या वडिलांचं नाव आहे. त्यांचं आज सकाळी निधन झालं.

शुक्रवारी अचानकपणे वडिलांचं निधन झाल्याने घरातील वातावरण बदललं. आईने मुलाला धीर देत मृतदेह घरात ठेवून मुलाचं शैक्षणिक नुकसान होऊ नये म्हणून त्याला बारावीच्या परीक्षेसाठी पाठविलं. नातेवाईकांनीही तुकाराम याला धीर दिला. आधी पेपरला जाण्याचा सल्ला दिला. मग तुकाराम रूपटक्के हा मनावर दगड ठेवून परिक्षेला सामोरा गेला. आणि गणिताचा पेपर देऊन दुपारी घरी परतला.

गणिताचा पेपर संपल्यानंतर केले अंत्यसंस्कार

तुकारामने आधी गणिताचा पेपर दिला आणि पेपर संपल्यानंतर घरी परतला. वडिलांच्या अंत्यविधी करत मुखाग्नी दिली. नातेवाईकांनीही मुलासाठी दुपारपर्यंत अंत्यविधी थांबवला होता. हुलजंती गावात सकाळपासून शोककळा पसरली होती. गावातील अनेक विद्यार्थी बारावीची परीक्षा देत आहेत. विद्यार्थ्यांच्या परीक्षेत कोणत्याही प्रकारची बाधा येऊ नये म्हणून ग्रामस्थही विशेष प्रयत्न करत आहेत. हुलजंती येथील कल्लाप्पा आबा रूपटक्के (वय ६०) यांच्यावर सायंकाळी अंतिम संस्कार करण्यात आले. घरावर दुःखाचा डोंगर कोसळला असतानाही तुकारामने गणिताचा पेपर दिला. आणि ही तुकारामच्या धैर्याचीही परीक्षा ठरली. परीक्षा काळात आधीच विद्यार्थ्यांच्या मनावर प्रचंड ताण असतो. फक्त विद्यार्थीच नव्हे तर कुटुंबीय तणावात असतात. अशात अचानक एखादी दुःखद घटना घडल्याने सर्वांना मोठा धक्का बसतो. पण तुकारामला कुटुंबीयांनी धीर दिल्याने त्याला बिकट प्रसंगाला तोंड देता आलं.